A Fiscalía de Galicia propón recorrer contra a sentenza do TSXG polo asasinato de Samuel Luiz

A Fiscalía de Galicia formulou un escrito de preparación de recurso de casación contra a sentenza da Sala do Civil e Penal do Tribunal Superior de Xustiza de Galicia polo asasinato de Samuel Luiz, que absolve a Alejandro Míguez como cómplice por carecer de probas.

A Fiscalía de Galicia manifestou este xoves que considera que "a sentenza do TSXG infrinxe o artigo 24 da Constitución Española, vulnerando o dereito á tutela xudicial efectiva, a presunción de inocencia, a interdición da arbitrariedade dos poderes públicos e o dereito a un procedemento xudicial con todas as garantías". Considera tamén que hai un erro na avaliación da proba e infracción da lei penal.

Todo iso relativo única e exclusivamente á persoa absolta, Alejandro Míguez, que fora condenado como cómplice de asasinato en primeira instancia. Na sentenza do 20 de maio, o alto tribunal galego absolveu a Míguez, mentres mantiña as condenas contra Diego Montaña, de 24 anos, coa agravante de homofobia; Alejandro Freire, Yumba, 20 anos, e Kaio Amaral Silva, 20 anos e 6 meses ao engadir o roubo do teléfono.

A Fiscalía galega entende, por tanto, que debería anularse a sentenza ditada polo TSXG e facer unha nova na que se condene a Alejandro Míguez como cómplice e se manteña a condena para os outros tres acusados.

Con todo, será a Fiscalía do Tribunal Supremo quen tome a decisión de presentar recurso contra a sentenza ante o Tribunal Supremo unha vez se cumpran os trámites xudiciais oportunos.

Coa absolución de Alejandro Míguez e a previa de Catherine Katy Silva reducíronse a cinco os condenados, hai outros dous que eran menores de idade no momento dos feitos e xa cumpriron as súas penas, pola agresión grupal que matou a Samuel Luiz o 3 de xullo de 2021 na Coruña.