A traxectoria do Cangas colle pulo cun extraordinario triunfo diante do Ademar
A traxectoria do Cangas colle pulo cun extraordinario triunfo diante do Ademar
Segunda vitoria consecutiva (34-31) do equipo do Morrazo, que se sitúa a catro puntos do Cuenca, o vindeiro rival que visita o Gatañal
Jorge Pérez estivo maxistral na portería con catro penaltis detidos
O Frigoríficos do Morrazo sumou a segunda vitoria consecutiva na Asobal, deu un paso case definitivo para afastarse do descenso directo e achégase a catro puntos do Cuenca coa posibilidade mesmo de evitar o play out. Os conquenses serán, precisamente, o vindeiro rival que visiten o Pavillón do Gatañal noutro duelo subliñado en vermello.
Diante doutro grande da competición o Cangas ofreceu unha imaxe inmellorable. Os de Nacho Moyano amosaron a súa ambición desde o principio e acadaron unha gran secuencia anotadora. No minuto 21 o resultado era de 15-10 e ao descanso aguantaba os cinco goles de vantaxe (21-16).
No segundo tempo agardábase a presión do poderoso Ademar de León, pero o Cangas contivo todas as tentativas visitantes de achegarse no marcador. Só conseguiron poñerse a tres goles, e cando quedaba un minuto para o final e estaba o peixe vendido (34-31).
