Miguel Román pasará polo quirófano, e estará entre catro e seis semanas de baixa
O xogador do Celta será sometido nos próximos días a unha artroscopia
Á lesión de Román súmase a de Sebastián Cáceres durante a concentración da selección uruguaia
Segundo o Celta, Miguel Román presenta un corpo libre articular no seu xeonllo dereito, segundo revelan as probas médicas ás que foi sometido tras a dor aguda que sufriu durante o adestramento de onte na Cidade Deportiva Afouteza.
O xogador celeste, que experimentou as molestias tras un golpeo de balón, foi sometido a unha exploración clínica e a unha resonancia magnética que confirmaron a presenza dun corpo libre articular cuxo tamaño fai necesario o seu tratamento cirúrxico para a súa extracción mediante artroscopia.
A cirurxía será levada a cabo nos próximos días polo xefe dos servizos médicos do club, o Dr. Juan José García Cota. En ausencia de complicacións, estímase un período de baixa de entre 4 e 6 semanas.
Miguel Román incorporouse a tempada pasada ao primeiro equipo desde o filial e converteuse rapidamente nunha peza indispensable para Giráldez, quen o perdeu na recta final do curso por unha lesión nun pé da que tivo que ser operado.
PARTE MÉDICO 🏥 Miguel Román
— Celta (@RCCelta) September 29, 2026
O centrocampista celeste presenta un corpo libre articular no xeonllo dereito, segundo confirmaron as probas médicas realizadas tras as molestias sufridas no adestramento de onte.
O xogador será sometido nos próximos días a unha artroscopia para a… pic.twitter.com/mhfpt2gRXo
Aínda por riba, á lesión de Román sumouse a de Sebastián Cáceres durante a concentración da selección uruguaia. O defensa central do Celta non participou no amigable que o combinado charrúa disputou contra Corea do Sur debido a "problemas físicos" que a federación uruguaia non detalla. Á espera de coñecer o tipo e o alcance da lesión, o futbolista está a viaxar a tal hora de regreso a Vigo para ser tratado polos servizos médicos do Celta.
