O tramo entre Brión e Urdilde da futura autovía a Noia estará acabado en 2027

O presidente da Xunta, Alfonso Rueda, visitou este martes as obras do primeiro tramo de conversión en autovía da VAC 1.5 Brión-Noia, ata Urdilde, que ten un orzamento de 11,4 millóns de euros e un prazo de execución de 18 meses.

Rueda, que estivo acompañado pola conselleira de Vivenda e Planificación de Infraestruturas, María Martínez Allegue, asegurou que esta obra de 5 quilómetros achegará "máis seguridade viaria, máis comodidade, máis rapidez e máis desenvolvemento".

O presidente galego destacou que uns 13.000 vehículos circulan diariamente por este corredor, dando servizo a unhas 160.000 persoas da área; aínda que son "moitas máis no verán" polo tránsito cara ás praias da zona desde a capital galega.

Ademais da conversión en autovía deste corredor ata Noia, citou a prolongación da autovía cara a Estrada desde a capital galega, a AG-59, cuxo segundo tramo se poñerá en marcha proximamente, co terceiro tramo xa en obras, sinalou.

Martínez Allegue sinalou que se atrasou a posta en marcha do segundo tramo debido á choiva do inverno, aínda que confirmou que estará lista no verán.