O temporal Joseph deixa máis de 800 incidencias en Galicia

O 112 Galicia rexistrou 812 incidencias relacionadas co temporal Joseph e atendeu 3.557 chamadas de avisos vencellados á borrasca.

Se ata as 18 horas do luns o número de incidencias rexistradas non chegaban a 400, as últimas horas de onte e as primeiras horas deste martes, ata as 8 horas, duplicaron os avisos aos servizos de emerxencias.

Desde este luns, a Central de Emerxencias contabilizou un total de 4 accidentes en que foi necesaria a intervención dos bombeiros para o rescate de persoas, 51 sinistros en que houbo feridos, pero sen necesidade de liberación e, finalmente, 79 sen feridos.

O xerente do 112 Galicia, Marcos Araújo, quen avanzou os datos no programa Bos días de Televisión de Galicia, salientou que os feridos atendidos en accidentes de tráfico nas últimas horas "non son de gravidade".

Segundo precisa o boletín da Central de Emerxencias, non todos os accidentes de circulación rexistrados están relacionados coa meteoroloxía, pero si houbo, nas últimas horas, moitos sinistros ocasionados por obxectos e vexetación presentes na vía.

"Tanto árbores como desprendementos de terra e pedras, así como a formación de fochancas nos pavimentos, poden causar colisións ou saídas de vía, polo que insistimos na necesidade de extremar a precaución durante a condución", advirte o comunicado.

Especialmente, nas primeiras horas deste martes sucederon moitas colisións debido á presenza de pólas, árbores, obxectos desprazados, desprendementos de terra e pedras e mesmo a formación de fochancas nos pavimentos.

Incidencias na circulación e riscos en vivendas

Ademais dos accidentes, debemos contar o número de intervencións dos equipos de emerxencias debido á caída de árbores (233), inundacións en estradas, rúas, bolsas de auga (89), caída de cables, postes, carteis e sinais de tráfico (72), obxectos desprazados na vía (56), desprendementos de terra e pedras (47), asolagamentos en vivendas, garaxes e baixos comerciais (38), derrubamentos (14), fochancas (10).

Por fortuna, ningunha destas incidencias derivou en danos persoais importantes, aínda que si materiais.

Deste xeito, cómpre sinalar unha árbore que caeu enriba dun vehículo en Ponteareas (EP-4005) e Castro de Rei (LUP-1611), o asolagamento dunha vivenda e o aparcamento do colexio Xacinto Amigo Leira, en Val do Dubra.

Tamén o desbordamento do río Umia en Caldas de Reis, que afectou varios vehículos estacionados e garaxes. Ademais, algúns condutores foron sorprendidos por riadas ou desbordamentos de ríos próximos, como aconteceu en Viveiro e en Portas.

Por último, o vento levantou o tellado dunha casa en Salvaterra de Miño e do cuartel da Garda Civil en Sanxenxo.

Por provincias

En canto ao repartimento de incidencias por provincias, destaca Pontevedra, con 384; A Coruña, con 268; Lugo, con 95, e Ourense, con 64.  

Prealerta activada ante a posible enchente do río Miño ao seu paso por Lugo, onde xa está desbordado nalgúns puntos

O Centro de Control de cunca da Confederación Hidrográfica do Miño-Sil informa este martes, 27 de xaneiro, que a estación do Sistema Automático de Información Hidrolóxica (SAIH), N001 no río Miño en Lugo, rexistra uns niveis que superan ou limiar de pre-alerta (nivel LARANXA) cunha evolución que fai previsible situacións significativas de enchente.

De feito, en numerosas zonas da contorna do Miño a crecida xa se notou, asolagando os puntos habituais de desbordamento. Un deles é precisamente o Muíño de Olga, que está en obras para converterse nun centro de interpretación fluvial dependente da USC, e onde os operarios traballan a contrarreloxo para retirar os aveños e maquinaria que poden ser danados pola auga.

Por iso, dende a Área de Transición Ecolóxica informan de que non se recomenda o tránsito peonil no tramo do paseo do Miño entre ou Balneario de Lugo e o restaurante O Muíño pola enchente do río ao seu paso pola cidade.

Ademais, faise un chamamento á cidadanía para pedirlle que non se achegue ata as zonas inundables próximas aos ríos, evitando correr riscos innecesarios para non poñer en perigo a súa seguridade.

Pero non só a cidade de Lugo está en alerta, xa que varios concellos polos que pasa o Miño están tamén con problemas de inundacións. O Club Fluvial de Begonte é un dos afectados, así como numerosas estradas locais que se están cortado pola auga acumulada, con casos en municipios como Guitiriz, Cospeito, Vilalba ou Xermade, entre outros moitos.

 

O transporte de ría en Vigo recupera certa normalidade

Pola súa banda, en Vigo, o transporte de ría recuperou certa normalidade este martes. Así, despois dun luns no que o servizo estivo suspendido na práctica totalidade das súas viaxes, as conexións entre o porto vigués e o porto de Cangas retomáronse á primeira hora, aínda que a navieira informou de que as primeiras viaxes da mañá faríanse cunha frecuencia de 30 minutos, para adecuar a velocidade dos barcos ás condicións meteorolóxicas adversas.

No caso da ruta entre Vigo e Moaña, canceláronse as viaxes de primeira hora da mañá, entre as 6:30 horas e as 9:00 horas, momento en que quedou restablecido o servizo.

Plans alternativos de transporte en tren

Ademais das incidencias nas estradas, durante este martes realízanse traballos de recoñecemento da infraestrutura ferroviaria tras os cortes de onte luns.

Deste xeito mantéñense plans alternativos de transporte por estrada entre Ourense e Vigo así como entre Ourense e Santiago en trens de media distancia.

Os servizos do Eixo Atlántico de ancho convencional préstase con orixe/destino alternativo Vigo Urzáiz-A Coruña.

Chuvia menos intensa e aviso laranxa por ondada este martes

A choiva foi intensa no interior da provincia de Pontevedra, onde estaba activado o aviso vermello, e onde se superaron os 150 litros por metro cadrado acumulados en municipios como Forcarei.

O Concello de Lugo informou de que as copiosas precipitacións das últimas horas provocaron unha subida de caudal do río Miño ao seu paso pola cidade, cuns niveis que "xa superan o limiar de prealerta".

O vento tamén soprou con intensidade durante toda a madrugada en toda a comunidade, cun refacho que superou os 146 quilómetros por hora en Carballeda de Valdeorras (Ourense) e numerosos puntos tanto na costa como en altura con refachos superiores ao 100 km/h.

Durante esta xornada seguirá chovendo, aínda que con menos intensidade, e está activado o aviso laranxa en todo o litoral por ondas que poden alcanzar os sete metros, segundo a previsión de MeteoGalicia.