O Supremo dá 48 horas para alegar antes de resolver sobre a lei de netos

O Tribunal Supremo deu un prazo improrrogable de 48 horas ás partes para que presenten as alegacións que consideren convenientes, antes de resolver sobre se levanta a suspensión cautelar das inscricións no censo electoral dos nacionalizados españois pola lei de netos.

En dúas providencias, a Sala do Contencioso-Administrativo indica que dá este prazo de alegacións antes de decidir sobre o recurso de reposición da Avogacía do Estado contra a suspensión cautelar de inscricións no Censo Electoral de Residentes Ausentes no Estranxeiro (CERA) acordada polo tribunal.

Todo iso ante a circunstancia da convocatoria de eleccións xerais anticipadas para o próximo 29 de novembro, que levou a Iustitia Europa e Vox a presentar novos escritos sobre o CERA.

Por tanto, a Fiscalía, a Avogacía do Estado -que representa o Ministerio de Xustiza, a Xunta Electoral Central e o Instituto Nacional de Estatística- Iustitia Europa e Vox teñen ata as 15:00 horas deste xoves para remitir os seus escritos.

No entanto, as alegacións das partes deberán estenderse tamén, segundo explica a providencia, ao emprazamento das persoas que obtivesen a nacionalidade española pola lei de netos e fosen ou non inscritas no censo, sen dar mais detalles de como executar esa actuación

Tras recibir todas as alegacións, a Sala resolverá de xeito conxunto todas as cuestións expostas, algo que se espera xa para a próxima semana, tendo en conta que se trata dun asunto delicado que se complicou máis se cabe tras a convocatoria electoral.

A Avogacía arremetía no seu escrito contra o "exceso" que supón a decisión do Supremo porque aqueles "nacionais españois que adquiriron a nacionalidade española con todos os dereitos inherentes aos que, sen tacha algunha de ilegalidade por este tribunal, está a cernarse o dereito de sufraxio".

E advertía de que "resulta materialmente imposible" revisar ao redor de 170.000 expedientes de novos electores que accederon á nacionalidade pola instrución do Goberno relativa á lei de netos, antes do peche do censo o 1 de xaneiro.

Pero ocorre que co adianto electoral, o último censo é o do 1 de agosto e aí figuran altas afectadas pola suspensión cautelar do Supremo que é posterior, de setembro.

Iso é o que revela Iustitia Europa, que pediu ao alto tribunal que "acorde as actuacións de execución e concreción que resulten necesarias" para "garantir" que a suspensión cautelar sexa aplicada nas eleccións do próximo 29 de novembro.

Pola súa banda, Vox pediu ao Supremo que suspenda o dereito ao voto de todos os españois que adquiriron a nacionalidade como consecuencia da lei de netos, incluídos os fillos e netos de exiliados, se a Xunta Electoral Central non acredita esta circunstancia.