O detido por matar a traballadora social pasará a disposición xudicial desde o hospital, posiblemente este xoves

O detido por matar, presuntamente, a unha traballadora social, Teresa, que coidaba á súa muller no Porriño (Pontevedra) pasará a disposición xudicial previsiblemente este xoves, pero farao desde o hospital, segundo informa o Tribunal Superior de Xustiza de Galicia.

O septuaxenario atópase ingresado desde o día do crime, o pasado martes, no hospital Álvaro Cunqueiro de Vigo, onde está a ser sometido a unha avaliación psiquiátrica.

Aínda que está previsto o seu pase a disposición xudicial, non será trasladado ao xulgado do Porriño que leva o caso.

Por agora, descoñécese se o detido prestará declaración desde o hospital, xa que o forense deberá informar sobre a súa capacidade para facelo.

Este mércores foron moitas as mostras de dor e repulsa tras o asasinato de Teresa de Jesús, unha coidadora do servizo de axuda no fogar, que foi atacada mortalmente nun dos domicilios onde traballaba. Pola tarde celebrouse diante da Casa do Concello unha concentración de repulsa.

A vítima comunicara pouco antes do crime que non quería volver traballar nesa casa. Dixo que o suposto agresor a acosara sexualmente. Falou coa CIG e tamén coa empresa que xestiona o servizo, pero non deu tempo de tramitar unha denuncia nin de tomar medidas.

A Xunta colaborará coa Fegamp en elaborar un protocolo de protección para o SAF

A conselleira de Política Social e Igualdade, Fabiola García, asegurou esta mañá que a Xunta apoia a creación dun protocolo no marco da Federación Galega de Municipios e Provincias (Fegamp) para a protección do persoal do Servizo de Axuda non Fogar (SAF).

Nunha entrevista na Radio Galega, dixo que a Xunta colaborará en todo o posible para garantir a seguridade destas traballadoras, para as que reclamaron un protocolo tanto o BNG como o PPdeG, despois do asasinato do martes.

García apoiou, en concreto, a proposta do PPdeG de que se redacte un protocolo con criterios comúns e estratexias de actuación ante posibles cuestións derivadas do exercicio da actividade laboral, segundo informou a Consellería.

O obxectivo sería dotar desta ferramenta aos concellos, que son os encargados de prestar un servizo que reciben diariamente nos seus domicilios máis de 24.000 dependentes galegos.

Sobre o caso do Porriño, a conselleira reiterou a máis firme condena da Xunta ante o sucedido e instou as traballadoras do SAF a que denuncien calquera situación de acoso ante os concellos ou ante as forzas e corpos de seguridade do Estado.

A CIG convoca folga no SAF

 O sindicato CIG convocou para o mércores 13 de agosto unha xornada de folga nos servizos de axuda en fogar de Galicia (SAF polas súas iniciais en galego) tras o asasinato dunha traballadora social, Teresa, o pasado martes no Porriño (Pontevedra), nunha das vivendas que atendía.

A central sindical galega pretende dar resposta así á morte da traballadora, solidarizarse coa súa familia e esixir medidas que garantan a protección efectiva das empregadas do sector.