O sindicato CGT denuncia continuas incidencias na liña férrea entre Vigo e Ponferrada
Esta mesma mañá, os viaxeiros tiveron que facer en autobús o traxecto Vigo-Ourense
O sindicato denuncia a antigüidade dos trens, que sofren continuas avarías
As avarías volven complicar as viaxes en tren polo corredor do Miño. A CGT ferroviaria denuncia que estas incidencias son continuas e atribúeas ao estado dos trens que cobren a liña entre Vigo e Ponferrada.
Esta mañá, un dia máis, os viaxeiros que tiñan previsto coller o tren de media distancia que une a estación de Vigo-Guixar con Ponferrada, víronse obrigados a desprazarse en autobús.
Os que fan a ruta con frecuencia non se sorprenden. saben xa dos imprevistos que se poden presentar. Dende o mes de xuño a Confederación Xeral do Traballo vén denunciando continuas incidencias debido ao estado e á antiguidade dos trens asignados a esta liña.
En máis de 50 ocasións houbo que transportar os viaxeiros en taxis ou autobuses para que chegaran ao seu destino.
A liña entre Vigo e Ponferrada dá tamén servizo a Salvaterra, Ourense, Monforte, Quiroga, A Rúa e O Barco. Denuncia tamén o sindicato que, mentres se amplían servizos e se incorpora novo material, no Eixo Atlántico entre Vigo e A Coruña, as liñas que comunican o interior de Galicia están condenadas a funcionar con vehículos anticuados que sofren continuas incidencias.
