O Sergas trasladará os servizos da zona Materno Infantil do CHUO tras a caída do falso teito

Cargando resultados...

Publicador de contidos

Tras o último incidente e o clamor de familias e profesionais, o paridoiro e a hospitalización infantil e obstétrica aloxaranse noutras zonas do CHUO

Grupos políticos, profesionais sanitarios e familias esixiron o peche e "traslado inmediato" de todos os servizos/Brais Lorenzo/ EFE

G24.gal 01/04/2025 19:10

A actividade Materno Infantil do Complexo Hospitalario Universitario de Ourense (CHUO) trasladarase nos próximos días a outras zonas do mesmo, por mor da derruba de parte do teito ocorrido o sábado.

Así o confirma a Xerencia da área Sanitaria nun comunicado en que concreta que se está ultimando "un plan" para adiantar este traslado, que afecta tanto á área a de hospitalización infantil e obstétrica como aos paridoiros, co obxectivo de "facilitar a revisión completa" dos falsos teitos.

A xerencia explicou que este cambio requirirá "unha reorganización no conxunto do complexo hospitalario" e implicarán "movementos previos e diversas actuacións para a adecuación dos novos espazos".

"Os traballos suporán unha intervención na planta cero de consultas do Materno, o traslado da Unidade de Coidados Paliativos ao Piñor e a recolocación da área de dirección, situada na quinta planta do edificio cirúrxico, en módulos prefabricados", detallaron.

Así mesmo, no espazo ocupado actualmente pola dirección, emprazaranse os dormitorios de persoal médico de garda, mentres que os corredores esquerdos do Cristal acollerán a hospitalización infantil e obstétrica.

Ademais, parte dos quirófanos de cirurxía maior ambulatoria da primeira planta do edificio cirúrxico acollerán os paridoiros e "un dos novos módulos de UCI converterase na UCI pediátrica e neonatal".

A xerencia estuda tamén a instalación de dúas unidades móbiles das que dispón o Sergas equipadas como quirófano "para manter e garantir a actividade asistencia de cirurxía maior ambulatoria durante estes traslados provisionais ata dispoñer da ampliación prevista".

Protesta ante a situación "precaria" do edificio

Tras esta decisión, as portas do CHUO acolleron unha concentración polo hartazgo ante a "precaria" situación do edificio. Os manifestantes reclamaban unhas infraestruturas que respeten os dereitos dos usuarios.

"Ás preocupacións de ser nai agora hai que engadir a preocupación de ter unha sala onde estar soa ou onde non caia o teito enriba", citan portavoces da concentración.

As mesmas persoas afirman que houbo casos de dúas nais dando a luz xuntas na mesma sala e que non existe unha zona de espera para os familiares, polo que consideran que "xa debería de haber unha manifestación aínda que non se estivese caendo o teito en pedazos".

Asunción Maus, da comisión de centro, declarou que denuncian o parón nas obras do novo edificio, que leva máis de seis meses sen avances: "Se non temos edificio, non podemos continuar coas obras do plan director, que xa levan moito atraso".

Así mesmo, mencionou a saturación do hospital e a incomodidade constante a traballadores e pacientes por atoparse en obra contínua.

Queixas da oposición

A deputada do BNG no Parlamento galego Noa Presas anunciou que no pleno da próxima semana vai escoitar " aos traballadores e tomar medidas inmediatas".

"Cada segundo que siga a actividade hospitalaria neste edificio é un perigo público", asegurou Presas.

Tamén o PSdeG presentou unha batería de iniciativas cuestionando á Xunta "desde cando coñece o mal estado do Materno Infantil e por que non tomou medidas respeto diso".