O Sergas anula as cirurxías non urxentes no hospital de Verín por un fungo

O Sergas anulou as cirurxías non urxentes no hospital comarcal de Verín por un fungo. Trátase dun fungo ambiental, con pouco potencial patóxeno, aclaran dende o Sergas, que foi detectado nun control rutineiro dos que realiza o Servizo de Medicina Preventiva.

As intervencións urxentes poden realizarse, xa que seguen operativos dous dos tres quirófanos cos que conta o hospital. Unicamente se derivarán a Ourense aquelas cirurxías en que se coloque material protésico ou implantes. Os técnicos están a revisar os circuítos de climatización dos quirófanos e contan con poder recuperar a normalidade a vindeira semana.

A aparición do fungo obrigou a atrasar operacións de traumatoloxía e oftalmoloxía previstas para estes días.