O reto do marrón, posible razón das feces nas piscinas de Friol e Guitiriz

Hainos mellor pensados...

"Eu supoño que serían nenos pero os pais deberían ter máis coidado", opina un mozo que é usuario habitual.

E máis desconfiados...

"Os que fan iso son maiores, e fano con todo o coñecemento. Xa pasou algunha vez no País Vasco tamén", sospeita unha veciña que emigrou hai anos alá. 

Guitiriz e Friol, unha piscina que pecha antes de que a outra poida reabrir por excrementos na auga. A casualidade alimenta a sospeita.

"Pasou o ano pasado, por un reto viral dos que saen nas redes. Parece que a xente o pasa ben facendo iso", apunta Luciano García, xerente de Instalacións Deportivas Norte, encargados do mantemento en Friol.

"Escoitei falar diso á xente porque tamén pasou en Friol pero a min ese reto non me parece correcto", engade o mozo.

Coñécese como o reto do marrón. E bo marrón que é, a efectos do tratamento.

"Hai que matar as bacterias e calquera resto que estea en contacto porque ao ser auga poden quedar restos que afecten aos filtros e estenderse na auga. Perdes tres días. Tes que facer unha análise para comprobar que non quedan pseudomona nin escherichias", explica Luciano García.

E marrón tamén para os usuarios, máis aínda en concellos do interior coas temperaturas disparadas e con poucas alternativas de ocio.

"Sen iso quedas sen nada"

"Unha alternativa con estes calores é achegarse á praia ou vir á piscina"

"A min paréceme unha falta de respecto para a xente que imos habitualmente. Hai que coidar as instalacións, que son para aproveitar todos"

Friol reabre hoxe. Guitiriz, tamén. Ambas confiando en non máis retos sen graza.