O Rácing estrea a Liga con remonta diante do Talavera (2-1)

O Rácing comezou con bo pé a temporada na Primera RFEF, na que ten o claro obxectivo de recuperar o seu posto no fútbol profesional. Os de Pablo López tiveron que remontar diante do Talavera, pero acabaron quedando cos tres puntos nunha Malata cun gran ambiente.

Saiu mellor o Rácing, que protagonizou os primeiros achegamentos e gozou de varios saques desde o curruncho, pero o primeiro tiro entre os tres paus foi de Valen para o Talavera. Parou seguro Miquel Parera. O Rácing non atinaba co arco de Jaime González, malia a un disparo lonxano de Gorostidi que saía preto do pau, e chegou entón a labazada. Un pase entre liñas a Marcos Moreno, que definía na área pequena marchando de Parera con sague frío.

O 0-1 non descentraba aos ferroláns, que tiveron outra nas botas de Zalaya antes de que Jairo igualase o marcador. Foi aos 27 minutos, cun lanzamento axustado desde a frontal da área.

Comezaba un partido novo antes da media hora, pero a tónica mantívose, co Rácing dominando, e o Talavera saíndo con moito perigo, especialmente de Valen, que gozou de dúas boas ocasións: un remate ao pau, e outro desde o punto de penalti que saiu moi axustado.

Na segunda metade, o Rácing culminaba axiña a remonta. Foi aos catro minutos, logo dunha falta lateral. O primeiro saque rematou na rede, anulado porque o colexiado non asubiara. Volveuse botar a falta e Zalaya volveuna enviar ao fondo da portería para establecer o 2-1.

Quedaba moito partido, e o Talavera botouse á busca do empate con boas ocasións, especialmente un remate co calcaño de Marcos Moreno que non atopaba portería, e outra cabezada do dianteiro que rexeitou o pau. Nos minutos finais, o Talavera pediu revisión de dúas xogadas na área, pero o aárbitro non apreciou nada sancionable. Remonta e vitoria do Rácing nesta primeira xornada na Primeira RFEF.