O Rácing afástase do título da Primeira RFEF ao perder co Amorebieta (3-0)

Foi a última viaxe do Rácing esta temporada. Aínda coa resaca do éxito e os cabelos brancos, testemuño das celebracións.

Último partido tamén do Amorebieta no humilde campo de Urritxe. A vindeira temporada este cruzamento entre biscaíños e ferroláns na Segunda división hase disputar en Lezama.

O Rácing vestiu de branco e ofreceulle o corredor de honra ao campión do grupo 2, co fillo de Julen Guerrero destacando no cadro local.

Tempo para os menos habituais. Cristóbal fixo sete trocos respecto ao once da semana anterior.
Esperábase máis dun partido entre os dous mellores equipos de Primeira federación. Pero faltou a intensidade da liga. Non tivo tampouco acerto na finalización o Rácing. E si o Amorebieta, que marcou tres goles en 6 minutos. Repartidos nos dous tempos.

Adiantouse no minuto 41 tras un erro defensivo. Diego Rivas parou o disparo de Julen, pero o rexeitamento acabou co gol de Unai Buján.

Xusto antes do descanso, chegou o segundo tras unha falta que botou Iker Seguín dende o medio do campo. Rexeitou Bourdal de cabeza, pero o balón rebotou no ombreiro do dianteiro Pradera e coouse na portería de Diego Rivas.

E ao pouco de comezar o segundo tempo, os locais completaron co 3 a 0 nunha xogada en que a defensa do Rácing se viu superada. Ewan Urain marcou o gol que pechou o marcador.

Traballo cumprido para os biscaíños. Os ferroláns tiveron minutos por diante para reducir a vantaxe. Tentouno Carlos Vicente dende a banda, e tamén con disparos dende lonxe Aitor PAscual e Del Pozo  pero non conseguiron bater a porta local.

O partido de volta da final de campións será na Malata o vindeiro sábado.