O PSOE pide que Mark Zuckerberg compareza no Congreso pola espionaxe a usuarios

O PSOE rexistrou no Congreso a petición de comparecencia de Mark Zuckerberg, fundador e director executivo de Meta; de Javier Oliván, xefe de operacións (COO) da compañía e de José Luis Zimmermann, director de Asuntos Públicos para España e Portugal, pola suposta espionaxe a millóns de usuarios.

O presidente o Goberno, Pedro Sánchez, xa anunciou hai varias semanas, nunha intervención no foro Metafuturo (Atresmedia), que os socialistas levarían ao Congreso aos responsables de Meta para que dean explicacións por rastrexar sen permiso a navegación en teléfonos móbiles.

O xigante estadounidense Meta, propietario de Facebook, Instagram e WhatsApp, asegurou pouco despois, nun comunicado remitido a EFE, que está disposto a colaborar "de forma construtiva coas autoridades neste asunto".

Os socialistas, que pediron tamén a comparecencia de expertos ante a Comisión de Economía, Comercio e Transformación Dixital do Congreso, lembran que a investigación anunciada por Sánchez derívase da información revelada por varios centros europeos sobre a posible violación da privacidade de millóns de usuarios en España e Europa.

"En España a lei está por encima de calquera algoritmo ou gran tecnolóxica e quen vulnere os nosos dereitos, pagará as consecuencias", dixo Sánchez.

Trátase dunha investigación realizada por centros de referencia internacionais —IMDEA Networks (España), a Universidade Católica de Lovaina (Bélxica) e a Universidade de Radboud (Países Baixos)—, que revelou que Meta utilizou durante case un ano un mecanismo oculto para rastrexar a actividade web de usuarios de dispositivos Android a través das aplicacións de Facebook e Instagram.

Este sistema permitía á compañía rexistrar as páxinas visitadas, mesmo cando os usuarios empregaban modo incógnito ou VPN, e vincular esa información aos seus perfís persoais nas plataformas de Meta, "unha espionaxe silenciosa sen ningún tipo de consentimento explícito", subliña o grupo socialista.

Nun comunicado, sinala que, de confirmarse, esta práctica supoñería unha violación de múltiples normativas europeas: o RGPD, a Directiva ePrivacy, a Lei de Mercados Dixitais (DMA) e a Lei de Servizos Dixitais (DSA), e lembra que Meta xa se enfronta a demandas colectivas en Alemaña, os Estados Unidos e o Canadá por feitos similares.