Feijóo aposta pola prudencia mentres non baixe a curva de contaxios
Feijóo recoñeceu "tensións na sanidade, especialmente na Atención Primaria", pero subliñou que, "o 99,3 % das persoas contaxiadas por covid están nas súas casas"
O presidente da Xunta, Alberto Núñez Feijóo, manifestou este mércores, á espera das decisións que ratifique o subcomité clínico na súa reunión, que ao seu modo de ver, en vista da alza de contaxios de covid-19 pero dado que a situación sanitaria en Galicia "non é preocupante", o conveniente é manter as restricións en vigor ata que baixe a curva.
Feijóo recoñeceu "tensións na sanidade, especialmente na Atención Primaria", pero subliñou que, "o 99,3 % das persoas contaxiadas por covid están nas súas casas". Nas UCI ve controlada a situación e, aínda que constatou o incremento das hospitalizacións en planta, tamén apuntou que encaixan coas previsións da Administración autonómica.
"Neste contexto, parécenos que, mentres que non baixe a incidencia, debemos manter con carácter xeral as decisións que tomamos en días anteriores. Son decisións de mínimos, mantemos a hostalería con horarios normais e o lecer nocturno ata as tres, que neste momento de contaxio masivo por ómicron, parécenos unha proposta razoable", asegurou.
Á espera do pronunciamento dos expertos sanitarios que asesoran a Xunta, remarcou que el ve conveniente manter as decisións tomadas a final de ano (e en principio vixentes ata o 18 de xaneiro) "ata que non empece a baixar a curva de novos contaxios diarios".
