O PNV mantén abertas as negociacións para os presupostos xerais

Este mércores arrancou no Congreso a votación das primeiras emendas aos presupostos xerais e o Goberno pasou o trámite con folgura, con 188 votos, superando a maioría absoluta. Para a voceira do executivo, Isabel Rodríguez, "unha vez máis demóstrase que o camiño é o diálogo".

 "Ata o rabo todo é touro, e aínda queda bastante trámite"

O PNV tamén votou a favor, aínda que o partido non dá por pechado o seu apoio. Conseguiron introducir 44 emendas, pero queren máis investimentos para o AVE vasco. Segundo o seu voceiro no Congreso, Aitor Esteban, "ata o rabo todo é toro, e aínda queda bastante trámite".

A formación jetzale mantén as negociacións abertas, tal e como se comprobou na rolda de prensa, cando Esteban recibiu unha chamada do negociador dos Presupostos, o ministro Félix Bolaños. E iso que agora os seis votos do PNV xa non son imprescindibles, tras conseguir sumar a Esquerra Republicana de Catalunya e a Bildu, un apoio que lle afea a oposición, pero que o Goberno defende.

Os votos do PNV sumáronse aos de PSOE, ERC, EH Bildu, Más País, Compromís, PDeCAT e Nova Canarias entre outros; pola contra, o BNG decidiu absterse.

Entre as emendas que o PNV conseguira introducir nos orzamentos está a mellora na prestación económica por coidado de menores afectados por cancro ou outra enfermidade grave, unha axuda que se estenderá desde os 18 anos ata os 23.

O Executivo ten garantida a aprobación da lei máis importante do ano e asegura a lexislatura de Pedro Sánchez.

Teruel Existe

O deputado de Teruel Existe Tomás Guitarte confirmou este mércores o seu apoio aos orzamentos de 2022.

Na súa intervención no pleno, Guitarte detallou que este martes pechou "o último floco" da negociación co Goberno, que non detallou, aínda que advertiu de que estará "moi vixiante" coa execución dos compromisos.

Os presupostos debátense esta semana no pleno do Congreso e este xoves afrontan a súa votación decisiva para o seu paso ao Senado.

Polo momento, o proxecto de Lei de Orzamentos Xerais do Estado ten garantidos 182 votos -PSOE (120), Unidas Podemos (34), ERC (13) EH Bildu (5), PDeCat (4), Más País (2), Compromís (1),  PRC (1), Nova Canarias (1) e Teruel Existe (1)-. Mentres seguen negociando os de PNV (6), aínda que as perspectivas apuntan ao voto favorable logo de que os nacionalistas vascos se posicionasen xunto aos socios de Goberno nesa primeira votación de emendas.