O percebe de Veiga, en Asturias, gaña o II Campionato Mundial do Percebe celebrado en Cedeira

O percebe de Cedeira posuía ata o de agora o título do mellor do mundo, pero xa non é así. O de Veiga, en Asturias, fíxose este ano co Campionato Mundial do Percebe. Iso si, seguido moi de preto do de Cedeira, que logrou o segundo posto.

No certame competiron 26 confrarías.

A variedade de procedencias púxollo difícil a un xurado formado por recoñecidos cociñeiros. Entre eles, o galego con dúas estrelas Michelín Javier Olleros, xefe de cociña do Restaurante Culler de Pau, no Grove: "Non é tan fácil rascar aí e notar as diferenzas, pero hainas". 

Nunha cata a cegas, degustaron percebe chegado de 17 confrarías galegas, pero tamén de Asturias, País Vasco, Marrocos, Portugal, Francia, Senegal ou Mauritania.

"A Característica principal é a súa profundidade de sabor, esa retención gustativa  que é única", asegura Albert Adriá, cociñeiro con dúas estrelas do Restaurante Enigma de Barcelona.

Bittor Arfinzoniz, cociñeiro do Asador Etxebarri, cualificado como un os mellores do mundo, tamén se refiriu a ese sabor a iodo e a mar do que se goza cando se está comendo é algo que non se coñece con ningún outro marisco.

Cedeira acolleu esta cita, organizada pola Deputación da Coruña, que pon en valor o percebe como produto gastronómico e a súa xente.

"O percebe é algo máis que un produto do mar, é un produto identitario totalmente. A xente asocia o bo percebe con Galicia", sinala Xosé Regueira, vicepresidente da Deputación Provincial da Coruña. 

O terceiro posto foi para Luarca.

Coa poxa dos tres lotes gañadores recadáronse 2.350 euros, que serán doados á Cruz Vermella.