O parque eólico pagará ata o 50 % da factura da luz en San Xoán de Río e A Pobra

Doce aeroxeradores formarán o futuro parque eólico Ventumelo. Dez deles estarán no concello de San Xoán de Río, a uns catro quilómetros da capital do municipio, e outros dous no da Pobra de Trives. 

"Conseguimos que a empresa poña X cantidade de euros ao ano para pagar a electricidade dos nosos  veciños, e por outra parte que, en igualdade de oportunidades, os traballos que xere o parque eólico durante a súa construción e despois para o seu mantemento sexan para persoas do noso concello e da Pobra de Trives, que son os dous concellos afectados por este parque." Xosé Miguel Pérez, alcalde de San Xoán de Río.

Estas axudas, que poden chegar a cubrir ata  o 50 % da factura da luz, serán xestionadas polos concellos e fixaranse en función do nivel de renda.  Calcúlase que arredor de cen persoas traballarán na construción do parque e unhas seis no seu mantemento posterior.

"Sempre e cando nos beneficiemos de algo... aínda que non todos estarán de acordo, porque a uns vailles molestar, a outros vainos beneficiar se hai uns pequenos descontos, e posto que estamos aquí no rural tamén vexo que postos de traballo non hai, se crean algúns, benvidos".

"A min paréceme ben, e xa que o van facer polo menos que os veciños se aproveiten de algo".

"Claro, se fan o parque que nos dean algún beneficio".

A medida porase en marcha unha vez comece a funcionar o parque eólico.