O paro suma 193.700 novos desempregados ao arranque do ano e pérdense 92.500 ocupados

O número de desempregados aumentou en 193.700 persoas no primeiro trimestre do ano, ata os 2,79 millóns, e o emprego reduciuse en 92.500 ocupados, ata os 21,76 millóns, nun período habitualmente malo para o mercado laboral.

Segundo a Enquisa de Poboación Activa publicada este luns polo Instituto Nacional de Estatística, o aumento do desemprego foi superior ao rexistrado no período anterior e a taxa de paro aumentou 75 centésimas, ata o 11,36 % da poboación activa. O aumento do paro foi superior á caída do emprego pola entrada á actividade de 101.200 persoas, que deixaron a poboación activa nos 24,55 millóns.

O incremento do paro nos tres primeiros meses deste ano é o máis pronunciado nun primeiro trimestre desde 2013, cando aumentou en 257.200 persoas. Pola súa banda, o descenso da ocupación mellora o rexistro do primeiro trimestre de 2024, cando se destruíron 139.700 traballos, pero non o de 2023, no que se perderon 11.100 postos de traballo.

Ao finalizar marzo, o número total de parados situouse en 2.789.200 persoas, a cifra máis alta desde o primeiro trimestre de 2024, e o de ocupados alcanzou os 21.765.400 traballadores, baixando así das cifras récord de 21,8 millóns de ocupados logradas nos dous últimos trimestres de 2024.

Con todo, nunha avaliación remitida aos medios de comunicación, o Ministerio de Economía, Comercio e Empresa resaltou que, en termos desestacionalizados, superáronse por primeira vez os 22 millóns de ocupados, tras crecer o emprego neste primeiro trimestre en 159.700 persoas (0,73 %). "Estes datos poñen de manifesto o dinamismo do mercado laboral, manténdose o ritmo na creación de emprego e con emprego máis estable e en sectores de maior valor engadido", engadiu o Departamento que dirixe Carlos Cuerpo.

O paro sobe en 1.600 persoas ata marzo en Galicia e destrúense 3.200 empregos 

O paro subiu en 1.600 persoas entre xaneiro e marzo en Galicia, o cal supón un 1,5 % máis que no trimestre anterior, mentres que a ocupación se reduciu en 3.200 persoas (0,28 %), segundo os datos que publica este luns o Instituto Nacional de Estatística (INE).

Deste xeito, segundo a Enquisa de Poboación Activa (EPA), os parados sitúanse na comunidade galega en 111.000 ao peche do primeiro trimestre, e a ocupación baixa a 1.150.100 persoas.