Cal e area no mercado laboral, por Maite Cancelo

As afiliacións á Seguridade Social no mes de maio aumentaron en máis de 195 mil, co que alcanzaron os 21,8 millóns. Ao mesmo tempo o paro descendeu en case 58 mil persoas situándose o conxunto en menos de 2,5 millóns. Datos que aparentemente son bos, pero con matices.

A pesar de que xa se empeza a notar o “efecto verán” e que as afiliacións crecen, este maio foi o peor mes desde o comezo da pandemia, o que pode indicar unha suave desaceleración na creación de emprego a pesar de que o ciclo económico xoga a favor deste indicador. Ademais, máis de 70 mil son novos empregos públicos, polo que a economía produtiva non é a que está a tirar da xeración de emprego.

Con relación ao paro rexistrado, en comparación co mes de maio do ano anterior o descenso foi de case 153 mil persoas, pero se eliminamos os efectos estacionais, a redución foi de pouco máis de 12 mil. Fontes do goberno sacan peito ao sinalar que é a cifra máis baixa desde o 2008 pero sen contar que houbo un cambio metodolóxico no cálculo deste indicador que complica a comparativa (lembremos que os fixos descontinuos cando non traballan non computan como parados, aínda que cobran a prestación).

España segue tendo unha taxa de paro a dous díxitos (10 % en abril fronte á media da UE do 6 %) e por 39 meses consecutivos é o país europeo con maior porcentaxe de poboación activa sen traballo e é o terceiro peor dato dun mes de maio nos últimos anos, tanto no dato desestacionalizado como na comparativa interanual.

A estacionalidade é o principal factor que provoca un aumento das afiliacións. O inicio da tempada turística fai que sexa a hostalería a que volve liderar este incremento, pero, como se sinalou anteriormente este foi o peor mes de maio desde hai catro anos, o que vén acompañado da caída interanual no número de contratos (-0,8 %) e que máis da metade dos mesmos son a tempo parcial ou fixos-descontinuos.

Cando falamos de que maio non foi un mes tan bo como nos queren facer ver temos que ver que, se desestacionalizamos o dato de afiliacións a subida queda só en 20.790, ou sexa, un 10,6 % do total, sendo o peor dato intermensual nos últimos doce anos.

España mantén a taxa de paro máis alta da UE, cun 11,7 %, e a maior taxa de paro xuvenil, cun 26,5 %. Ademais, o envellecemento da poboación activa dificulta a redución do desemprego, xa que un terzo dos parados de longa duración ten máis de 55 anos, grupo que enfronta maiores obstáculos para reinserirse no mercado laboral.

Para resumir, aínda que os datos de maio mostran melloras en afiliación e redución do paro, estes avances están fortemente influenciados por factores estacionais e non reflicten unha mellora estrutural do mercado laboral. A persistencia de altas taxas de desemprego estrutural, a precariedade na contratación e os riscos económicos externos suxiren que a recuperación do emprego en España aínda afronta desafíos significativos.