O papel de Aspas na renovación de Carreira: "Iago é un gran negociante"
Apuntou que a insistencia de Claudio Giráldez tamén foi moi importante na súa decisión de continuar no Celta
Iago Aspas exerce de líder no campo e capitán no vestiario. Ademais é membro da dirección deportiva no Celta de Vigo sempre que pode botar unha man a Marco Garcés. O moañés sempre está pendente do mercado de fichaxes, chamando futbolistas para convencelos de asinar polos celestes, e dos seus compañeiros.
Con Sergio Carreira, que renovou o seu contrato xusto cando ía expirar o pasado 30 de xuño, volveu aparecer para tranquilizar o canteirán.
Marco Garcés, director deportivo do Celta, recoñeceu que a de Sergio Carreira é "unha das renovacións máis solicitadas por parte de toda a afección, dos seus compañeiros e todos os membros do club".
No plano deportivo destacou que "ratificou o seu nivel nas canchas" e que "se converteu en alguén moi importante" no vestiario. A pesar de contar con ofertas superiores doutros equipos o canteirán apostou por renovar o seu contrato.
"Sempre dixen que son celtista, Vigo é a miña casa".
Sergio Carreira apuntou que a insistencia de Claudio Giráldez tamén foi moi importante na súa decisión de continuar no Celta.
"Estiven en continuas conversacións con Claudio e Iago no verán. Se estou aquí tamén é en parte grazas a eles", continuou explicando o defensa.
Poder xogar en Europa esta tempada tamén é unha das razóns que lle fixo declinarse por continuar.
"Non gozalo agora sería unha pena".
Sobre o papel de Iago Aspas na renovación do seu contrato chanceou revelando que "é un gran negociante ademais dun gran xogador. É insistente, expúxome a súa opinión sen tentar influír na miña decisión porque el tamén viviu situacións similares".
