O número de sinistros contra animais duplicáronse nos últimos anos

Os accidentes contra animais son cada vez máis habituais nas estradas españolas. Segundo un informe de Línea Directa, estes sinistros duplicáronse nos últimos cinco anos ata chegar aos 11.400. A maioría prodúcense en zonas rurais, durante as noites da fin de semana e entre os meses de setembro e decembro.

Santiago Velázquez, director de Comunicación de Línea Directa, asegura que este incremento é debido á despoboación e ao abandono do medio rural. Tamén sinala que dende que comezou a pandemia os accidentes contra animais domésticos aumentaron un vintedous por cento.

Pero o animal que segue causando máis estragos nas estradas galegas é o xabaril. Segundo datos da DXT, foi o culpable de 3.340 accidentes de circulación na nosa comunidade o ano pasado, a maioría nas provincias de Lugo e Ourense. De aí a importancia de saber actuar nestes casos.

Cristina Sinde, da autoescola SC-20, recomenda frear forte, non cambiar de carril, non dar golpes de volante e se a colisión é inevitable sinalizar a zona para evitar outro accidente e chamar aos corpos e forzas de seguridade.

Outra das recomendacións é non tocar nunca o animal xa que se está ferido de gravidade pode atacarnos para intentar defenderse.