O Nepal mantén as procuras 11 días despois da riada tras novos rescates con vida

O Nepal mantivo este sábado as operacións de procura once días despois da riada que devastou o norte do país, alentado polos novos rescates con vida rexistrados nas últimas horas mentres centos de traballadores continúan desaparecidos en centrais hidroeléctricas arrasadas pola auga e o barro.

O ministro do Interior, Sudhan Gurung, afirmou tras os rescates que os achados deixaran “un raio de esperanza” e asegurou que as operacións continuarían dentro dos túneles.

A procura segue activa en varios dos complexos hidroeléctricos máis afectados, con apoio de especialistas da India, a China e Corea do Sur, segundo as últimas actualizacións oficiais do Gobierno nepalí.

Este sábado un cidadán chinés foi rescatado dun túnel de Upper Trishuli-1, en Rasuwa, nunha operación conxunta do Exército nepalí e un equipo surcoreano, apenas un día despois de que outros dous traballadores foran atopados vivos en Upper Trishuli 3A tras permaneceren atrapados desde o 26 de agosto.

Upper Trishuli-1 concentra un dos maiores operativos, máis de 1.400 persoas vinculadas ao proxecto atopábanse aí cando se produciu a catástrofe, 557 permanecen sen localizar e ao redor de 115 poderían seguir atrapadas na zona da presa e o túnel principal, segundo a empresa promotora.

Asemade, Chandrika Shrestha, de 64 anos, foi localizada nunha vivenda do mercado de Betrawati, en Nuwakot, despois de que os equipos recibiran información de que se escoitaba unha voz procedente do interior da casa, segundo medios locais.

A muller foi rescatada por un equipo da Policía Armada do Nepal dirixido polo inspector Suman BK e trasladada para recibir primeiros auxilios antes de ser evacuada cara a Katmandú, informou a oficina do primeiro ministro.

As autoridades non explicaron aínda como logrou sobrevivir durante tantos días atrapada na vivenda nin se tivo acceso a auga ou alimentos.

O último cómputo consolidado pola Policía do Nepal elevaba a 1.344 os corpos e restos humanos recuperados e a 4.887 as persoas aínda sen localizar, mentres os corpos de seguridade participan nun operativo que continúa tamén en comunidades de Rasuwa e Nuwakot e ao longo do corredor do Trishuli, onde equipos terrestres e helicópteros buscan desaparecidos, evacúan afectados e levan subministracións a poboacións illadas pola destrución de estradas e pontes.