Excarcerada unha muller logo de envorcar co coche na A-52 en Melón, Ourense

Unha muller duns 50 anos quedou ferida tras sufrir unha saída da vía na A-52, no punto quilométrico 265, en Melón, Ourense. Era a única ocupante do vehículo.

O accidente sucedeu arredor das 22:00 da noite do sábado, e foi debido a un despiste da condutora nunha zona de obras da estrada.

Segundo o particular que contactou co 112 Galicia, un turismo foise da A-52, cunha persoa ferida no interior.

Ata o lugar achegáronse o Servizo de Urxencias Sanitarias de Galicia-061, os Bombeiros do Carballiño, o GES de Ribadavia e a Garda Civil de Tráfico.

Os membros do GES tiveron que empregar o material de excarceración para que a muller puidera saír do vehículo, que estaba envorcado logo do accidente. Horas despois retirouse o vehículo.

A afectada tivo que ser trasladada en ambulancia ata o hospital de referencia.