O Liceo enfrontarase ao Barcelos nos cuartos de final da Champions
Gañou o último partido da fase de grupos diante do Trissino por 7-6
O Liceo xogará diante do Barcelos nos cuartos de final da Champions de hóckey a patíns. Xa sabían que ían ocupar a cuarta praza no seu grupo pero quedaba pendente de saber cal ía ser o primeiro clasificado do outro grupo. O empate do Barcelos diante do Porto fixo que garantira esa praza.
O último partido foi unha tolemia de goles e alternativas, algo moi diferente ao que se viu ao longo da competición para o Liceo. Comezou gañando cun gol de Carballeira. Remontou o Trissino cos tantos de Jordi Méndez e Perera. Antes do descanso Bruno Saavedra e Dava Torres poñían o 3-2.
Jordi Méndez anotou un dobrete ao pouco de comezar o segundo tempo (3-4) e o Liceo reaccionou dun xeito espectacular con goles de Xaus, Nil Cervera e Ciocale (6-4). Quedaba outro pulo do Trissino que cos tantos de Jordi Méndez e Cocco empataba o encontro (6-6). Foi Ferruccio o que marcou o gol da vitoria a tres minutos do final.
