O IPC moderouse dúas décimas en maio, ata o 2 %, e os alimentos repuntaron ao 2,5 %

O Instituto Nacional de Estatística revisou o índice de prezos ao consumo de maio ata o 2 %, unha taxa unha décima superior á adiantada hai dúas semanas e dúas décimas por baixo da de abril, mentres que a inflación dos alimentos repuntou cinco décimas, ata o 2,5 %.

O INE tamén revisou este venres unha décima á alza a inflación subxacente, que non ten en conta a enerxía nin os alimentos non elaborados, e sitúaa no 2,2 % interanual, dúas décimas menos que a de abril. A moderación da taxa xeral débese, principalmente, ao grupo do lecer e a cultura, cuxa taxa diminuíu 2,2 puntos, ata o 0,5 %, polo abaratamento dos paquetes turísticos, e ao da vivenda, cunha taxa situada no 3,8 %, catro décimas menos, polo menor encarecemento da electricidade.

De feito, o Ministerio de Economía, Comercio e Empresa destacou nun comunicado que no descenso dos prezos rexistrado en maio tiveron especial importancia a favorable evolución dos servizos relacionados co turismo, o transporte aéreo de pasaxeiros e o bo comportamento dos prezos da electricidade.

En concreto, segundo o INE, o grupo de lecer e cultura recortou 2,2 puntos a súa taxa interanual en maio, ata o 0,5 %, polo abaratamento dos paquetes turísticos, en tanto que o grupo de vivenda reduciu catro décimas a súa taxa interanual, ata o 3,8 %, pola evolución dos prezos da electricidade. Por contra, o grupo de alimentos e bebidas non alcohólicas elevou cinco décimas a súa taxa interanual en maio, ata o 2,5 %, pola subida dos prezos da froita.

A subxacente modérase ao 2,2 % 

A inflación subxacente (sen alimentos non elaborados nin produtos enerxéticos) descendeu dúas décimas en maio, ata o 2,2%, aínda que se esperaba unha redución maior, de tres décimas, ata o 2,1%. A subxacente sitúase así dúas décimas por encima do índice xeral de maio. Co descenso da taxa en maio, a inflación subxacente volve á senda da moderación despois de que en abril experimentase unha repunta de catro décimas. Pola súa banda, o IPC harmonizado (IPCH) recortou dúas décimas a súa taxa interanual en maio, ata o 2 %, mentres que se mantivo sen cambios en valores mensuais.

Subida mensual do 0,1 %pola roupa e as froitas

En termos mensuais (maio sobre abril), o IPC incrementou un 0,1 %, aínda que os datos avanzados por Estatística a finais do mes pasado apuntaban ao estancamento dos prezos. Coa repunta de maio, a inflación acumula oito meses consecutivos de ascensos mensuais. O avance mensual do IPC obedece ao incremento de prezos nun 2,5 % no grupo de vestido e calzado pola tempada de primavera-verán e ao aumento nun 0,5 % no grupo dos alimentos polo encarecemento das froitas.

Por contra, en maio diminuíu a taxa mensual do grupo de lecer e cultura nun 1,9 % pola baixada dos prezos dos paquetes turísticos e a do grupo de transporte nun 1 % polo abaratamento dos carburantes e lubricantes para vehículos persoais e o transporte aéreo de pasaxeiros.

O IPC moderouse dúas décimas en maio, ata o 1,7 %, e os alimentos repuntaron ao 1,5 %

O Índice de Prezos ao Consumo de maio en Galicia moderouse ata o 1,7 %, dúas décimas menos que o dato interanual de abril, mentres que o prezo dos alimentos aumentou catro décimas, ata o 1,5 %, segundo os datos publicados este venres polo Instituto Nacional de Estatística. Galicia é a quinta comunidade autónoma con menor inflación e sitúase tres décimas por baixo da media xeral, que chega ao 2 %. O prezo dos alimentos está un punto por debaixo.

A moderación da taxa xeral débese ao grupo do lecer e a cultura, cuxa taxa diminuíu 2 puntos, ata o 0,3 %, polo abaratamento dos paquetes turísticos; tamén a un menor incremento do grupo da vivenda, que encareceu un 3,3 %, seis décimas menos que o dato interanual do mes anterior por un menor incremento no prezo da electricidade. Ademais da vivenda e dos alimentos, o resto de grupos tamén encareceron os seus prezos; máis o de hoteis, cafés e restaurantes, un 4,9 %, as bebidas alcohólicas e o tabaco, 3 %, e a educación, 2,6 %.