O IPC cae seis décimas en xaneiro e arrinca 2026 no 2,3 %, pola baixada de luz e carburantes

O Índice de Prezos de Consumo recortou a súa taxa interanual en xaneiro seis décimas, ata o 2,3 %, o seu menor nivel desde o pasado mes de xuño, debido á baixada dos prezos dos carburantes para vehículos persoais e á evolución dos prezos da electricidade, segundo os datos definitivos publicados este venres polo Instituto Nacional de Estatística.

O descenso é unha décima superior ao esperado, pois Estatística avanzou a finais do mes pasado un IPC do 2,4 %, cinco décimas por baixo do dato de decembro de 2025. Con esta moderación de seis décimas no primeiro mes do ano, o IPC interanual encadea tres meses consecutivos de baixadas, despois de que en outubro de 2025 pechase no seu nivel máis alto en 16 meses (3,1 %).

Estatística explicou que a evolución do primeiro mes de 2026 é debida, principalmente, á baixada dos prezos dos carburantes e lubricantes para vehículos persoais, fronte ao incremento de xaneiro de 2025. Tamén a que os prezos da electricidade soben, pero menos que no mesmo mes do ano anterior.

En concreto, o grupo de vivenda recortou tres puntos a súa taxa interanual en xaneiro, ata o 2,7 %, pola evolución dos prezos da electricidade, mentres o do transporte presentou unha taxa interanual case dous puntos menor, ata situarse no 0,1 % polo abaratamento das gasolinas para vehículos persoais.

O Ministerio de Economía, Comercio e Empresa destacou que o descenso da inflación experimentado en xaneiro é o máis acusado desde marzo de 2025 e reflicte que os prezos seguen moderándose, en liña co obxectivo do Banco Central Europeo (BCE) de que a inflación se manteña estable preto do 2 %. Isto, resalta Economía, permite ás familias seguiren gañando poder adquisitivo.

Neste sentido, o departamento que dirixe Carlos Cuerpo subliñou que no conxunto de 2025, a capacidade de compra agregada dos fogares aumentou un 1,5 % grazas a que as subidas dos salarios foron superiores á inflación media do exercicio.

Pola súa banda, a inflación subxacente (sen alimentos non elaborados nin produtos enerxéticos) mantívose no 2,6 % por terceiro mes consecutivo. Por comunidades autónomas, todas elas presentaron taxas interanuais positivas no arranque do ano. Madrid rexistrou a taxa máis elevada (3 %), mentres que as máis moderadas se deron en Asturias, Castela-A Mancha, Galicia, Murcia e A Rioxa, todas elas cunha taxa do 1,9 %.

Os prezos baixan un 0,4 % no mes impulsados polas rebaixas

En termos mensuais (xaneiro do 2026 sobre decembro de 2025), o IPC baixou un 0,4 %, o seu maior retroceso mensual desde setembro de 2024, cando diminuíu un 0,6 %.

A caída do IPC no mes de xaneiro é consecuencia da baixada de prezos nun 13,1 % en vestido e calzado pola campaña de rebaixas de inverno, do abaratamento das actividades recreativas, deporte e cultura nun 2,8 % polo menor custo dos paquetes turísticos e do grupo de transporte, que recortou os seus prezos un 1,1 % pola diminución dos prezos doutros servizos relacionados con vehículos persoais e dos combustibles e lubricantes para vehículos persoais.

Por contra, o grupo de vivenda elevou un 0,9 % os seus prezos en xaneiro respecto ao mes anterior por mor do encarecemento da electricidade. Pola súa banda, o IPC harmonizado (IPCH) recortou seis décimas a súa taxa interanual en xaneiro, ata o 2,4 %, cunha variación mensual do -0,8 %.

A inflación moderouse ao 1,9 % en Galicia en xaneiro e a dos alimentos baixou ao 3 %

Os prezos subiron en Galicia un 1,9 % en xaneiro respecto ao mesmo mes de 2025, sete décimas menos que o dato co que pechou o ano (2,6 %), mentres que a inflación dos alimentos se moderou dúas décimas, ao 3 %.

Galicia rexistrou a mesma taxa que A Rioxa, Murcia, Castela-A Mancha e Asturias, e estas cinco comunidades autónomas marcaron a inflación máis baixa do conxunto de España, onde os prezos subiron de media un 2,3 % en xaneiro, segundo os datos publicados este xoves polo Instituto Nacional de Estatística (INE).

A inflación dos alimentos situouse na media estatal (3 %), e, en variación mensual, os prezos baixaron un 0,4 % en Galicia respecto a decembro.

A maioría dos grupos rexistraron taxas de inflación positivas en xaneiro en termos interanuais, á excepción do vestido e o calzado, onde baixou un 2,7 %; o transporte, onde caeu un 0,8 %, e a información e comunicacións, que se reduciu un 0,1 %.

Pola contra, o que máis subiu foron os seguros e servizos financeiros, un 5,2 %, seguidos polos restaurantes e o aloxamento (4,6 %), as bebidas alcohólicas e o tabaco (4,2 %) e os alimentos (3 %).

Tamén subiron os servizos de educación (2,7 %), o coidado persoal e outros (2,6 %), a vivenda (2,4 %), a sanidade (2,3 %), as actividades recreativas, deporte e cultura (1,3 %) e os mobles e artigos do fogar (0,7 %).