O Infoca dá por estabilizado o incendio de Huelva
As 96 persoas que quedaban desaloxadas poderán volver ás súas casas
Rocío Ruz / Europa Press
O Plan Infoca deu por estabilizado o incendio forestal declarado o pasado luns na paraxe Los Turbios de Villanueva de los Castillejos (Huelva) tras afectar máis de 5.000 hectáreas deste municipio e dos de San Bartolomé de la Torre e Gibraleón e provocar o desaloxo de máis de 370 persoas.
En declaracións aos medios de comunicación no Posto de Mando Avanzado (PMA), o conselleiro de Presidencia, Sanidade e Emerxencias de Andalucía, Antonio Sanz, precisou que a estabilización se decretou tras a análise dos últimos informes e datos por parte do Comité de Dirección e tras o éxito dos traballos realizados este mércores.
Destacou que, tras unha xornada de tensión e incerteza, o xiro da situación representa "a noticia máis esperada e ansiada" que implica, ademais, que se desescale o Plan de Emerxencias por Incendios Forestais do nivel operativo 2 ao 1, polo que as 96 persoas que quedaban desaloxadas poderán volver ás súas casas.
Tamén confirmou que as estradas se atopan normalizadas e que se está á espera de que Adif autorice a reapertura da vía ferroviaria Huelva-Zafra, certificando que o incendio "entra nunha fase totalmente distinta orientada ao seu control definitivo".
O conselleiro puxo en valor o éxito da planificación estratéxica desenvolvida fronte a un incendio "voraz e complexo" que ameazaba con descontrolarse e asegurou que "aínda que todo apuntaba a que hoxe sería un día moi difícil, acertouse na estratexia e na planificación".
O operativo contou cunha despregadura de máis de 500 efectivos nas últimas xornadas. Neste sentido, Sanz expresou o seu máximo recoñecemento a todo o persoal do Infoca, aos bombeiros do consorcio da Deputación de Huelva e á Unidade Militar de Emerxencias (UME), dos que enxalzou a impecable coordinación e o espírito de colaboración institucional entre os diferentes corpos.
O agradecemento fíxose extensivo tamén á Garda Civil, á Unidade Adscrita, ás policías locais, aos equipos sanitarios, a Cruz Vermella e a Protección Civil.
Dun xeito moi especial, o conselleiro gabou a xestión dos concellos de San Bartolomé de la Torre e Gibraleón, agradecendo aos seus alcaldes a temperanza e firmeza amosadas na toma de decisións críticas.
Finalmente, dedicou unhas palabras de gratitude aos voluntarios e aos propios veciños afectados. Dizo que o seu comportamento "sereno e responsable" resultou clave para a seguridade de todo o operativo.
