O hospital de Ourense aplica unha cirurxía robótica de referencia no cancro de mama
En toda a sanidade pública española, só está implantada aquí e nun hospital de Badalona
Esta mesma mañá realizouse unha dobre mastectomía á que asistiron especialistas do hospital de Ferrol que queren incorporar tamén esta técnica, menos invasiva que a cirurxía convencional
O robot Da Vinci é a plataforma que emprega a unidade de cirurxía de mama de Ourense.
"Ao principio, cando empezas a manexar a técnica, non é tan fácil, pero cando xa a tes dominada é fácil", sinala Manuel García García, xefe de Cirurxía do CHUO.
Tamén beneficia os pacientes, ao tratarse dunha cirurxía menos invasiva.
"Manipúlanse menos os tecidos e, polo tanto, é menos traumática, menos dolorosa e cunha recuperación máis rápida", engade o xefe de Cirurxía.
Están realizando unha dobre mastectomía preventiva, unha operación que se lles practica a aquelas pacientes cunha elevada predisposición xenética a padeceren cancro de mama.
"O que facemos é sacar a mama por dentro e reconstruímos. Con iso, non eliminamos completamente o risco, pero reducímolo moito", explica Manuel García.
En toda a sanidade pública española, esta técnica, apoiada na plataforma robótica só está implantada aquí e no hospital Germans Trías de Badalona. Hoxe asisten cirurxiáns do hospital de Ferrol que tamén estudan incorporala.
"Aumenta a visibilidade, a facilidade en certos aspectos da intervención, como a disección...", di Manuel Díaz Tíe, xefe de Cirurxía do Hospital de Ferrol.
O robot Da Vinci chegou á sanidade galega en 2021 e emprégase, sobre todo, en cirurxía xeral. Este de Ourense leva actuado en preto de cincocentas operacións.
.jpg)