Quedan libres os catro detidos polo alixo de cocaína de Cambre, que entrou polo porto de Vigo

Continúa aberta a operación antidroga que rematou coa incautación de 7.200 quilos de cocaína en Cambre, o maior alixo requisado en Galicia neste ano 2023, e a detención de catro persoas.

Segundo informan este xoves varios medios de comunicación, a droga comisada saíu de Ecuador e entrou polo porto de Vigo en contedores que transportaban atún conxelado. Dende alí fixeron o percorrido, seguido xa moi de preto polos investigadores, ata a nave do polígono industrial do Espírito Santo, en Cambre, onde finalmente foi incautada.

Tamén foi alí onde se realizaron as catro detencións practicadas ata o momento en relación a este caso. Non obstante, eses catro arrestados foron postos xa en liberdade e, polo tanto, sospéitase que a súa implicación nesta rede de tráfico de drogas non alcanzaría cotas de importante responsabilidade, no caso de que a teñan dalgún tipo, e que os verdadeiros dirixentes da organización serían outros.

O valor deste alixo na rúa superaría os 400 millóns de euros. A subdelegada do Goberno na Coruña, María Rivas, incidía este mércores na importancia histórica do alixo de cocaína, como un dos máis relevantes de Galicia e de España.

Rivas confirmaba que "a operación segue aberta", e apuntou que aínda se desenvolvían "unha serie de rexistros" en diversos puntos.

Defendeu que "é un dos operativos máis importantes non só a nivel galego senón a nivel estatal" e comparouno co narcosubmarino de Aldán, que foi moi relevante e no que se atoparon 3 toneladas de droga.