Os galegos seguirán pagando as peaxes na AP-9

O Goberno remitiulle este mércores á Comisión Europea (CE) os datos sobre a prórroga da autoestrada que vertebra Galicia de norte a sur, a AP-9, e asegura que o procedemento continúa e esgotará as posibles opcións de resposta.

O Executivo esgotou o prazo dado por Bruxelas para non levar a prórroga da concesión desta autoestrada ao Tribunal de Xustiza da UE (TXUE), que finalizaba esta xornada, e enviou "as aclaracións precisas e a información xustificativa" sobre a prórroga da AP-9 aprobada por José María Aznar, entre 2023 e 2048.

Espera que eses datos sirvan para que a nivel europeo "se poida realizar unha valoración sempre en defensa dos intereses xerais de España".

"Esta fase non supón aínda o final do procedemento. Analizaremos os seguintes pasos da Comisión Europea con este recurso para, chegado o caso, esgotar as posibles opcións de resposta", proseguen as mesmas fontes.

Deste xeito, o Goberno non toma unha decisión, cando vencía o prazo concedido pola CE, e dilata o proceso á espera de que sexa a propia Comisión quen actúe despois da información remitida.

375 millóns de euros en bonificacións

O Executivo asegura que "para paliar as políticas do PP que levaron a alongar as peaxes, este Goberno apostou por unha política de bonificación de peaxes desa autoestrada e, por iso, desde abril de 2025 hai un desconto do 100 % da peaxe de retorno para vehículos lixeiros que realizan os seus traxectos de ida e volta en 24 horas".

"Desde 2018 e ata final de xuño deste ano co Goberno do presidente Pedro Sánchez, os usuarios aforráronse máis de 375 millóns de euros ao circular pola AP-9, en bonificacións directas ou limitando a subida das peaxes", agregan.

O Goberno alega que "a prórroga da concesión da autoestrada de peaxe AP-9 ata 2048 foi aprobada no ano 2000 polo Goberno do PP, presidido por José María Aznar".

"Se estamos nesta situación, polo tanto, é responsabilidade dos gobernos do Partido Popular. Correspóndelle ao PP explicar os motivos polos que tomou unha decisión que este Goberno non adoptase e que claramente é prexudicial para os dereitos dos cidadáns", xustifican as mesmas fontes.

Matizan que "aínda que as políticas de mobilidade e reequilibrio territorial que actualmente defende este Goberno van na dirección contraria, desde o Ministerio colaborouse e responderon a todos os requirimentos realizados pola Comisión Europea por responsabilidade e para velar polo interese común, como tamén fixemos nesta ocasión".