O Goberno propón a Teresa Peramato como nova fiscala xeral do Estado

O Consello de Ministros propuxo este martes como nova fiscala xeral do Estado a Teresa Peramato Martín, en substitución de Álvaro García Ortiz, que presentou este luns a súa renuncia tras ser condenado a dous anos de inhabilitación polo Tribunal Supremo (TS), segundo informaron fontes gobernamentais. Peramato foi presidenta da Unión Progresista de Fiscais (UPF), asociación da que proveñen os seus dous antecesores.

A elección de Peramato, desde hai un ano fiscala de sala xefa da Sección Penal da Fiscalía do Tribunal Supremo, ademais de fiscala de sala delegada para a Protección e Tutela das Vítimas no Proceso Penal, foi a proposta do ministro de Presidencia, Xustiza e Relacións coas Cortes, Félix Bolaños.

Bolaños asegurou que "non hai ningunha dúbida" de que Teresa Peramato "é unha persoa absolutamente idónea" para encabezar a Fiscalía Xeral do Estado e levar a cabo os "retos" que ten por diante a institución.

O ministro eloxiou o "compromiso feminista e a vocación de servizo público" de Teresa Peramato, unha persoa -dixo- que traballará para seguir reforzando a autonomía do Ministerio Fiscal e os medios materiais e humanos para cumprir o seu labor: "Perseguir o delito e cumprir a lei".

Ese é un dos retos que terá por diante Peramato nun momento en que o Goberno impulsou a reforma da Lei de Axuizamento Criminal que pretende dar a instrución dos casos penais aos fiscais.

Peramato é fiscal de carreira con 35 anos de exercicio e ten o "recoñecemento unánime" dos operadores xurídicos. Conta cunha ampla traxectoria especialmente en materia de loita contra a violencia de xénero. De feito, é considerada "unha das grandes impulsoras" da especialización xudicial nesta materia.

En 2005 foi nomeada fiscala delegada para a Sección de Violencia Sobre a Muller na Fiscalía Provincial de Madrid. Tamén foi membro do Grupo de Expertos do Observatorio Estatal de Violencia contra a Muller para a elaboración do primeiro informe anual do Observatorio Estatal de Violencia sobre a Muller (2007). Así mesmo, ocupou o cargo de fiscal de Sala contra a Violencia sobre a Muller entre 2021 e 2025.

Ademais, Peramato foi presidenta da Unión Progresista de Fiscais (UPF), de onde tamén proveñen os seus antecesores Álvaro García Ortiz e Dolores Delgado.

Este nomeamento ten lugar un día despois de que Álvaro García Ortiz presentase a súa renuncia como fiscal xeral do Estado tras ser condenado polo Tribunal Supremo a dous anos de inhabilitación para o cargo por un delito de revelación de segredos contra Alberto González Amador, o noivo da presidenta madrileña, Isabel Díaz Ayuso.

Unha vez que o Consello de Ministros propuxo a Peramato como substituta de García Ortiz, o Consello Xeral do Poder Xudicial deberá emitir un informe, aínda que non será vinculante.

Posteriormente, Peramato comparecerá ante a Comisión de Xustiza do Congreso dos Deputados e, unha vez que se realizaron estes trámites, o Goberno acordará o seu nomeamento definitivo como fiscal xeral do Estado.

O Goberno defende o compromiso de Álvaro García Ortiz coa "verdade e a xustiza"

A portavoz do Goberno, Pilar Alegría, recoñeceu este martes o labor de Álvaro García Ortiz como fiscal xeral do Estado, a quen cualificou de servidor público "comprometido coa verdade e coa xustiza".

Na conferencia de prensa posterior ao Consello de Ministros, Alegría sinalou que o Executivo iniciou este martes o proceso para nomear a Teresa Peramato como nova fiscala xeral do Estado en substitución de Álvaro García Ortiz, quen presentou a súa renuncia este luns tras a condena do Tribunal Supremo.

"Agradecer e recoñecer o labor de Álvaro García Ortiz, un servidor público que sempre estivo comprometido coa verdade e coa xustiza no noso país", subliñou Alegría.

Pola súa banda, o ministro da Presidencia, Xustiza e Relacións coas Cortes, Félix Bolaños, explicou que a idea do Goberno é que se García Ortiz se manteña no seu posto ata que se produza o nomeamento de Peramato.

Bolaños trasladou tamén o recoñecemento do Goberno a García Ortiz, quen -dixo- "foi obxecto de durísimos ataques desde mesmo antes do seu nomeamento".

"Desempeñou o cargo con brillantez. Antes de ser nomeado xa estaba a sufrir uns ataques desapiadados, e creo que a pesar de todo iso mantívose no seu lugar, garantindo a independencia e a autonomía do Ministerio fiscal, actuando cunha vocación de servizo indiscutible e tamén cunha dedicación persoal evidente e que todo o mundo puido comprobar", destacou Bolaños.

A Unión Progresista de Fiscais destaca o rigor de Peramato e a súa defensa dos dereitos

A Unión Progresista de Fiscais (UPF) celebrou a proposta de Teresa Peramato como fiscala xeral do Estado e destacou a súa acreditada solvencia técnica e traxectoria marcada polo rigor profesional, o sentido institucional e a defensa dos dereitos fundamentais.

Nun comunicado, a UPF, asociación que Peramato presidiu entre 2019 e 2021, destaca a súa dilatada carreira e asegura que se trata dunha profesional amplamente respectada pola xudicatura, a avogacía, os operadores xurídicos e pola propia carreira fiscal.

"A súa designación representa a elección dunha fiscal de acreditada solvencia técnica e unha traxectoria marcada polo rigor profesional, o sentido institucional e a defensa dos dereitos fundamentais", subliña.

O PP pregúntase se Sánchez seguirá usando a Fiscalía "en beneficio propio" con Peramato

O secretario xeral do PP, Miguel Tellado, non se pronunciou sobre a proposta como nova fiscala xeral do Estado, pero dixo que "a clave" é se o presidente do Goberno, Pedro Sánchez, vai renunciar a seguir politizando a Fiscalía ou a vai seguir usando "en beneficio propio".

Tellado, en declaracións aos medios tras acudir a un almorzo informativo co vicesecretario de Economía do PP, Alberto Nadal, subliñou que o seu partido recibe "con toda a cautela" a proposta de Peramato, subliñando que o importante é se Sánchez "segue crendo que a Fiscalía é súa  e se a vai seguir utilizando como cando o seu fiscal era Álvaro García Ortiz". "O importante non é a quen nomean, senón se o que o nomea aprendeu a lección", dixo Tellado, insistindo en que Sánchez nomeou a García Ortiz "para delinquir".