O fiscal xeral do Estado renuncia tras ser condenado polo Supremo: "É o momento de abandonar"

O fiscal xeral do Estado Álvaro García Ortiz presentou este luns a súa dimisión ao Goberno, despois de que o pasado xoves fora condenado polo Tribunal Supremo a dous anos de inhabilitación para o cargo por un delito de revelación de segredos.

Nunha carta remitida ao ministro de Xustiza Félix Bolaños, García Ortiz sostén que chegou o momento de abandonar o desempeño de tan alta responsabilidade e expresa o seu profundo respecto ás resolucións xudiciais.

O fiscal agradece ao Goberno o seu nomeamento e indica: "A confianza depositada entón é a mesma que agora devolvo ao renunciar ao cargo".

Ata que o Goberno designe novo fiscal xeral do Estado, a Fiscalía queda en mans da tenente fiscal do TS María Ángeles Sánchez Conde, persoa de máxima confianza de García Ortiz, que foi, precisamente, quen exerceu de fiscal no xuízo, reivindicando a súa inocencia.

A renuncia de García Ortiz tras unha sentenza histórica

Catro días despois de ser condenado polo Tribunal Supremo por revelación de segredos, Álvaro García Ortiz presenta a súa renuncia. Marcha, afirma, co convencemento de servir fielmente á institución e expresando o seu respecto polas decisións xudiciais.

"O profundo respecto ás resolucións xudiciais e a vontade -sempre presente no meu mandato- de protexer a Fiscalía española e os seus fiscais determinan a miña decisión de que, sen esperar sequera a coñecer a motivación da sentenza, presente a miña renuncia como fiscal xeral".

Nunha misiva remitida ao ministro de Xustiza Félix Bolaños, García Ortiz afirma: "Unha vez coñecida a sentenza, é o momento de abandonar o desempeño de tan alta responsabilidade. É un acto debido non só ao Ministerio Fiscal, senón a toda a cidadanía española", explica.

A pesar de dar este paso, García Ortiz expresa o seu convencemento de servir fielmente á institución, cunha inequívoca vocación de servizo público, sentido do deber e lealdade institucional.

Ademais, agradece ao Goberno o seu nomeamento como fiscal xeral do Estado. "A confianza depositada entón é a mesma que agora devolvo ao renunciar ao cargo", subliña.

A condena de García Ortiz

Álvaro García Ortiz foi condenado o pasado xoves polo Tribunal Supremo por un delito de revelación de segredos en relación coa filtración de datos da causa seguida por suposto delito fiscal contra o empresario Alberto González Amador, parella da presidenta da Comunidade de Madrid Isabel Díaz Ayuso.

O Supremo sentencionouno a dous anos de inhabilitación, unha multa de 7.200 euros e a que indemnice a González Amador en concepto de danos morais con 10.000 euros.

A condena queda lonxe das peticións realizadas polas acusacións, que reclamaban ata 6 anos de cárcere, 12 de inhabilitación, 108.000 euros de multa e 300.000 de indemnización.

A sentenza non foi unánime. Contou co apoio de cinco maxistrados -Andrés Martínez Arrieta, Manuel Marchena, José Ramón Berdugo, Antonio del Moral e Carmen Lamela- e co voto discrepante das maxistradas progresistas Ana Ferrer e Susana Polo.

Este domingo, o presidente do Goberno manifestou que segue crendo na inocencia do fiscal xeral pero rexeita falar dun indulto: "Acatamos pero non compartimos a sentenza", indicou.

Sánchez non desbota a presentación dun recurso ante o Tribunal Constitucional.

Que pasará agora con García Ortiz?

Tras a súa renuncia, Álvaro García Ortiz terá que solicitar o seu reingreso á carreira fiscal, xa que como fiscal xeral se atopaba en servizos especiais.

Fontes xurídicas advirten de que a dita volta podería ser problemática, porque o apartado d do artigo 46 do Estatuto Orgánico do Ministerio Fiscal (EOMF) establece que a condición de fiscal se perde cando existe unha pena principal ou accesoria de inhabilitación para cargos públicos.

A Inspección Fiscal é a encargada de abrir un procedemento de rehabilitación, no que escoitaría e practicaría as actuacións que considerase oportunas, para acabar emitindo un informe. Sería o novo fiscal xeral quen, co devandito informe e tras oír o Consello Fiscal, remitiría a súa proposta ao Ministerio de Xustiza para que resolvese.

Con todo, as voces consultadas insisten en que será necesario esperar ao contido íntegro da sentenza para ver se o tribunal concreta o ámbito de aplicación da condena imposta.