A fiscala xeral substitúe a fiscala superior de Madrid que se enfrontou a García Ortiz

A fiscala xeral do Estado, Teresa Peramato, propoñerá ao Goberno o nomeamento de María Isabel Martín como nova fiscala superior de Madrid, o que supón a substitución de Almudena Lastra, a fiscala que declarou contra Álvaro García Ortiz no xuízo en que foi condenado por revelar datos reservados.

Peramato, unha vez celebrado o Consello Fiscal, propoñerá 22 altos cargos da Fiscalía para o seu nomeamento polo Consello de Ministros. 

Segundo informou a Fiscalía este xoves, Peramato decidiu en función de "criterios de mérito e capacidade dos aspirantes, no seu amplo currículo e experiencia e nas propostas dos seus respectivos plans de actuación".

A praza de fiscal xefe de Lugo non recibiu candidaturas, polo que terá que ser convocada de novo.

Almudena Lastra, que aspiraba a manterse no posto de fiscala superior de Madrid no que leva cinco anos, será substituída por María Isabel Martín López, desde 2018 na Secretaría Técnica da Fiscalía, órgano de apoio da fiscala xeral.

Plan de actuación para "transformar a Fiscalía de Madrid"

Peramato destacou o seu "alto nivel de competencia técnica, rigor profesional e a súa acreditada capacidade para afrontar responsabilidades de especial complexidade e esixencia", alén do seu plan de actuación "para transformar a Fiscalía Superior de Madrid baixo os principios de excelencia, cohesión e servizo público".

Unha peza clave no equipo da fiscala xeral do Estado será María José Osuna, nova fiscala de Sala xefa da Inspección Fiscal, tras catro anos a cargo da Fiscalía de Tarragona. O tenente fiscal da Inspección será Juan José Criado.

Outro nomeamento relevante será o da fiscala provincial de Madrid, Pilar Rodríguez, quen chegou a estar investigada xunto ao anterior fiscal xeral na causa por revelación de segredos sobre a fraude fiscal de Alberto González Amador, noivo de Isabel Díaz Ayuso, e que ascende ao Tribunal Supremo como fiscal do Social.

Pola súa banda Pilar Fernández, muller de García Ortiz, deixará a Fiscalía de Menores en Madrid para volver a Galicia, onde será a nova tenenta fiscala da Fiscalía da comunidade autónoma.

A fiscala de Sala xefa da Sección Civil do Supremo seguirá sendo Pilar Martín Nájera, igual que Pedro Crespo seguirá a cargo da Fiscalía do Tribunal Constitucional. Antonio Romeral seguirá como tenente fiscal en Anticorrupción.

Pola súa banda, María Eugenia Hernández Fernández obtén praza na Audiencia Nacional.

Novos fiscais

O novo fiscal xefe de Baleares será Adrián Salazar, ata o de agora tenente fiscal nese territorio; en Canarias serao Jaime Serrano-Jover; en Castela-A Mancha segue Emilio Fernández; en Aragón María Asunción Losada; e en Estremadura Francisco Javier Montero.

O novo fiscal provincial de Cuenca será José Ernesto Fernández; en Burgos manterase José Fernández Mérida; en Castelló María Díaz Berbel.

Ernesto José Vieira será tenente fiscal da Fiscalía de Canarias; Antonio Mateos, da de Estremadura; Carolina Santos, da de Cantabria; e José Rogelio Muñoz seguirá na de Andalucía.

Fontes da Fiscalía destacaron que dos 22 nomeamentos hai seis da Asociación de Fiscais, outros seis da Unión Progresista de Fiscais, e o resto son non asociados.