O Goberno fixa os criterios para adiantar a xubilación en traballos penosos

O Consello de Ministros aprobou este martes un decreto que establece os criterios e o procedemento para determinar os supostos nos que se poden aplicar coeficientes redutores para adiantar a idade de xubilación en actividades especialmente penosas ou perigosas.

Segundo explicou na conferencia de prensa posterior á xuntanza do Executivo a ministra de Inclusión, Seguridade Social e Migracións, Elma Saiz, "hai traballos de especial dureza, outros que se fan duros nos últimos anos de vida laboral, con maior sinistralidade ou con máis accidentes de traballo ou enfermidades profesionais asociadas".

Neste decreto, froito do acordo cos axentes sociais, "aprobamos o procedemento para establecer cales son esas ocupacións (...) que poden beneficiarse do anticipo da idade de xubilación".

Pola súa banda, a portavoz do Goberno, Pilar Alegría, sinalou que esta medida que "nos achega ás aprobadas xa noutros países veciños como Francia, Austria ou Italia".

A norma establece os criterios, baseados en indicadores obxectivos, para que traballadores en ocupacións excepcionalmente penosas, perigosas ou insalubres e que acusen elevados índices de morbilidade ou mortalidade poidan anticipar a idade de xubilación ordinaria, sempre que non sexa posible unha mellora das súas condicións de traballo.

Penosidade, toxicidade, perigo e insalubridade

En concreto, dentro dos criterios para determinar a penosidade atópase a exposición a temperaturas, ruído ou vibracións extremas; o uso permanente da forza física; ou a exposición a axentes físicos, químicos ou biolóxicos.

En canto á toxicidade, afectará traballos con exposición a axentes físicos, químicos ou biolóxicos agresivos ou nocivos; mentres que o perigo contempla actividades susceptibles de causar un accidente laboral ou enfermidade profesional ao traballador cun maior grao de incidencia ou frecuencia que outros traballos.

Por último, a insalubridade refírese a actividades con exposición a un ambiente susceptible de ser prexudicial para a saúde do traballador.

Para acreditar a concorrencia de circunstancias obxectivas que xustifiquen a aplicación destes coeficientes estableceuse unha fórmula baseada en indicadores obxectivos.

Con todo iso, a Seguridade Social elaborará un informe en que se terán en conta tamén as continxencias comúns, as profesionais, a idade, o sexo, a rotación no traballo, a parcialidade, o tamaño da empresa ou a distribución xeográfica.

As organizacións empresariais, sindicais, de autónomos e administracións públicas serán as encargadas de solicitar estas condicións especiais para un colectivo en concreto, ao sumaranse informes da Seguridade Social ou a Inspección de Traballo, e unha comisión de avaliación decidirá se se dan as condicións para a aplicación de coeficientes redutores.

Estes coeficientes só poderán aplicarse a traballadores de polo menos 52 anos e implicarán unha sobrecotización, é dicir, un tipo adicional sobre a base de cotización por continxencias comúns, tanto a cargo da empresa como da persoa traballadora, que se fixará nos orzamentos xerais do Estado de cada ano.