As persoas con ELA avanzada recibirán ata 10.000 euros ao mes para atención 24 horas

O Goberno reforzou o sistema de dependencia con 500 millóns de euros para garantir a atención "intensiva e personalizada" 24 horas ao día das persoas con ELA, que cando se atopen en fase avanzada terán dereito a unha prestación de ata 10.000 euros ao mes en función da súa situación e necesidades.

O real decreto aprobado este martes polo Goberno, a pedimento do Ministerio de Dereitos Sociais, crea un novo grao de dependencia extrema ou grao III+ para dar protección específica a persoas con enfermidades neurolóxicas con coidados de alta complexidade e garantirlles atención personalizada de 24 horas.

Incorpora o dereito a unha prestación de ata 10.000 euros por paciente ao mes en fase avanzada que será financiado nun 50 % polo Estado e o outro 50 % polas administracións autonómicas. Coa aprobación de este decreto lei complétase o desenvolvemento normativo da lei ELA "en tempo e forma", e o financiamento do Estado en dependencia alcanza a cifra récord de 3.729 millóns de euros, destacou o ministro Pablo Bustinduy na conferencia de prensa tras o Consello de Ministros.

"O Sistema de Autonomía e Atención á Dependencia é un sistema de coidados que busca adecuarse ás necesidades das persoas usuarias e non ao revés", destacou o ministro. "Vai garantir unha atención próxima e comunitaria, que coide ás persoas en función das súas necesidades e desexos e que ofreza condicións dignas ás persoas que provén eses coidados".

Bustinduy convocou este xoves ás comunidades autónomas para coordinar "de maneira inmediata" a adaptación dos seus sistemas a este real decreto lei e proceder á repartición dos fondos. Ademais, explicou que se reunirá coas asociacións de enfermos e familiares, "que contribuíron de maneira exemplar na despregadura desta lei".

Críticas do PP

O Partido Popular considera que as medidas chegan tarde:

 "Neste ano faleceron máis de 1100 pacientes de ELA aos que non lles chegou o financiamento", di a portavoz no Congreso, Esther Muñoz.

E as asociacións de afectados cren que son incompletas.

"Non son dabondo. A lei ELA prevé moitas medidas adicionais. Nós seguiremos pedidndo que se recoñezan todos os dereitos que forom recoñecidos no seu momento", reclama Vanessa García, Directora de AGAELA.

En Galicia hai arredor de 300 afectados pola esclerose lateral amiotrófica, 200 deles xa reciben axudas directas da Xunta de Galicia de ata 12.000 euros anuais. É unha medida pioneira en España que nos presupostos do próximo ano quedará exenta de tributación.
 

Atención 24 horas

O decreto lei introduce cambios no Sistema de Autonomía e Atención á Dependencia (SAAD) para ofrecer ás persoas con ELA a cobertura que necesitan. Así, as persoas con ELA e outras enfermidades neurolóxicas graves en fase avanzada terán garantida esa atención 24 horas, creando o dereito a unha prestación de ata 10.000 euros por paciente (9.860 euros), coa que se ofrecerá a axuda que requiren para cuestións tan básicas como respirar ou comer, sendo apoios imprescindibles sen os cales habería un risco de morte.

Ese cálculo realizouse tendo en conta que estes coidados requiren cinco profesionais por persoa nesa fase avanzada e garante un investimento salarial de 118.423 euros en 14 pagas, explica o Goberno.

Novo grao de dependencia extrema

O gao III+ de dependencia extrema recoñece un novo dereito subxectivo a coidados intensivos para os pacientes con ELA e doutras enfermidades de alta complexidade e carácter irreversible, e garante atención especializada e supervisión 24 horas ao día. A adaptación do Sistema de Atención á Dependencia (SAAD) recoñece por primeira vez de forma específica a realidade das persoas con ELA e outras enfermidades de alta complexidade e carácter irreversible e impulsa un modelo de atención intensiva e personalizada, cunha cociente estimada de cinco profesionais por persoa beneficiaria. "Coa creación deste novo grao melloramos a nosa rede de protección social, facémola moito máis específica", subliñou o ministro.

Financiamento "récord" da dependencia

Bustinduy destacou que coa partida de 500 millóns de euros, o financiamento do sistema alcanzou este ano unha cifra récord de 3.729 millóns de euros, o que resulta "particularmente importante polas necesidades e tensións crecentes do sistema que só van ir a máis", en relación coa evolución demográfica.

Tamén lembrou que esta lexislatura transferíronse ás comunidades máis de 800 millóns de euros dos fondos europeos para ofrecer os servizos de atención á dependencia, poidan investir en teleasistencia, prazas residenciais, prazas non residenciais e centros de día. O responsable de Dereitos Sociais valorou "os esforzos" do Goberno de coalición desde 2020 para reverter "os intensos recortes en dependencia que sufriu o sistema na década pasada" co Executivo de Mariano Rajoy.

"Con estes 500 millóns de euros que aprobamos hoxe consolidarase, ademais, un aumento interanual do 7,2 % e un aumento do 15,5 % respecto a o orzado en 2023", agregou o ministro.

Observatorio da Vivenda

O consello de ministros deu tamén luz verde ao novo Observatorio da Vivenda Turística que se encargará de identificar os espazos das cidades con máis problemas de concentración de visitantes e de acceso a unha vivenda.

Esta medida vén sumarse ao rexistro de alugueiros de curta duración, entre eles os turísticos.