As axencias de cualificación Moody's e Fitch tamén melloran a nota de España

As axencias de cualificación crediticias Moody's e Fitch melloraron o rating soberano de España, despois de que hai dúas semanas S&P o elevara xa a A+ con perspectiva estable, tras 6 anos sen cambios.

Moody's elevou a nota de Baa1 a A3 con perspectiva estable grazas a que "a fortaleza económica do país" está a mellorar por un crecemento máis "equilibrado", pola evolución positiva do mercado laboral e o fortalecemento do sector bancario.

No caso da axencia Fitch a nota tamén mellora de A- a A. Fontes do Ministerio de Economía valoran que todas as axencias de rating sitúan a súa cualificación en A, "situación que se perdeu durante a crise financeira e que non se recuperou ata estes momentos".

"Isto é unha mostra máis da confianza internacional na economía española", subliñaron.

O forte crecemento económico, o impacto da migración, a actividade investidora ou a "protección" ante as consecuencias polos aranceis dos Estados Unidos estarían detrás destas melloras, que permiten a España conseguir un triplo histórico.

Organismos económicos nacionais e internacionais revisaron recentemente á alza as súas estimacións de crecemento para o produto interior bruto (PIB) español, ata taxas entre o 2,6% e o 2,7% este ano 2025.

Ademais, o propio Goberno, tras coñecer a mellora de cualificación por parte de S&P, tamén elevou unha décima a súa proxección de crecemento de PIB ata o 2,7% este ano.

Segundo argumentou, malia o "complexo contexto internacional", a economía española segue a presentar "signos claros de fortaleza" tanto a medio como a longo prazo.

Para 2026, a previsión de crecemento do Goberno mantense no 2,2%, mentres que para 2027 e para 2028 prevé que a economía española avance un 2,1% en cada un dos dous exercicios.

"Boas perspectivas da economía"

O ministro de Economía, Comercio e Empresa, Carlos Cuerpo, sinalou que as tres subas das axencias "visibilizan a confianza no crecemento e nas boas perspectivas da nosa economía".

Iso servirá, segundo dixo, "para atraer moitos máis investidores ás nosas emisións de débeda, é dicir, é un impulso para a demanda de débeda pública".

"E iso tradúcese nun aforro na factura de intereses que pagamos, do que tamén se benefician as nosas empresas", defendeu.