A economía española creceu un 2,8 % en 2025, tras avanzar un 0,8 % no último trimestre

A economía española creceu en 2025 un 2,8 % grazas ao empuxe da demanda interna (consumo e investimento), que impulsou o crecemento a pesar do lastre que supuxo a guerra arancelaria promovida polos Estados Unidos para o sector exterior.

A economía acelerou o ritmo de crecemento no último trimestre do ano, cun avance do 0,8 %, dúas décimas máis ca o trimestre precedente, de acordo cos datos de contabilidade nacional publicados este venres polo Instituto Nacional de Estatística (INE).​​​​

A responsable da desaceleración foi a demanda externa, que restou 0,8 puntos ao crecemento total, mentres que a achega positiva da demanda interna aumentou ata os 3,6 puntos.

España está "en boa posición" para revalidar un crecemento sólido en 2026, segundo Sánchez

O crecemento anual do 2,8 % quedou finalmente unha décima por baixo do que prevía o propio Goberno e a maioría de analistas nacionais e organismos internacionais.

O presidente do Goberno, Pedro Sánchez, destacou en redes sociais que España é a economía avanzada que máis crece por segundo ano consecutivo, máis do dobre do esperado para a zona euro "e en boa posición para revalidar un crecemento sólido este 2026".

Os indicadores do PIB, a exame

O consumo dos fogares creceu un 3,4 % en 2025, 0,4 puntos máis respecto a taxa de 2024, mentres que o consumo das administracións públicas creceu o 1,8 %, fronte ao 2,9 % dun ano antes.

O emprego equivalente a tempo completo incrementouse un 3,1 % en 2025 -fronte ao 2,8 % do ano anterior-, o que supón sumar 627.000 ocupados no ano.

O investimento acelerouse en 2025, cun crecemento do 6,3 % da formación bruta de capital fixo, cando un ano antes crecía a un ritmo do 3,6 %. Especialmente notable foi o investimento empresarial (maquinaria, bens de equipo e sistemas de armamento), que aumentou un 9 %, fronte ao 1,9 % dun ano antes.

O investimento en vivenda, edificación e construción pasou de crecer un 4 % en 2024 a facelo un 5,2 % en 2025.

A pesar da achega negativa do sector exterior, as exportacións de bens mantivéronse en positivo no conxunto do ano, cun avance do 0,7 %, 0,6 puntos máis que en 2024, mentres que as exportacións de servizos creceron o 8,3 %, por baixo do 9,3 % dun ano antes.

As importacións de bens creceron significativamente, un 6 %, fronte ao 0,7 % de 2024, en tanto que o incremento das importacións de servizos freouse ao 7,5 % respecto ao 13,8 % dun ano antes.

A construción foi o sector que máis valor engadido xerou á economía en 2025, cun avance do 5,6 %, seguido do sector servizos (3,2 %), a industria (2,3 %) e a agricultura (0,5 %).

Medido o PIB en rendas, a remuneración dos asalariados creceu o 7,2 % (7,3 % en 2024), o excedente de explotación bruto/renda mixta bruta subiu un 3,7 % (5,2 % en 2024) e os impostos menos subvencións sobre a produción e as importacións aumentaron un 7,3 % (7,9 % en 2024).