A Xunta reivindica un crecemento "máis sostible" e "sólido" ca a media e que Galicia resiste "mellor" turbulencias

O conselleiro de Facenda, Miguel Corgos, reivindicou que o produto interior bruto (PIB) de Galicia crece de maneira "máis sostible" e ten "uns compoñentes máis sólidos" nesta evolución á alza que a media española. Ademais, entende que a economía galega resiste "mellor" as turbulencias do panorama internacional.

Así se pronunciou en rolda de prensa para analizar os datos do PIB de 2025 que publica este venres o Instituto Galego de Estatística (IGE), que mostran que o aumento na comunidade galega é do 2,6%, fronte ao 2,8% do conxunto estatal, e tamén recolle un estancamento das exportacións.

En primeiro lugar, o titular de Facenda viu "moi positivo" que Galicia pechase o pasado ano cunha alza do 2,6 % da súa economía, que "mellora unha décima a previsión revisada pola Xunta". Ao elaborar os orzamentos do ano pasado, estimaba un incremento do 2,1 % e a revisión elevouno ao 2,5 %.

Destacou, a continuación, que "consolida un período de crecemento sostido de máis de cinco anos crecendo despois da pandemia, mellorando a previsión inicial".

En canto á composición desta evolución, sinalou que, ao seu xuízo, é "máis sostible que a media nacional, porque se basea sobre todo no crecemento do investimento, formación bruta de capital" e unha demanda externa que "aínda que está afectada polo que está a pasar -referiuse a "os aranceis de Trump"- resiste e achega en positivo".

Todo iso, segundo resaltou Miguel Corgos, "deriva nunha maior produtividade da economía galega".

No ámbito da construción, indicou que "reflicte o esforzo da Xunta en apostar por este sector e por paliar a necesidade de vivenda, o exceso de demanda aumentando a oferta".

Así as cousas, e a modo de balance desde finais de 2019, o conselleiro apuntou a unha "resposta máis resiliente e unha saída máis dinámica primeiro e logo en paralelo", en comparación con España, de modo que Galicia "mantén dous puntos de crecemento acumulado sobre a senda nacional".

En termos de emprego "tamén se alcanzan os obxectivos, o que permite resistir este ciclo de competencia e aranceis", segundo afirmou.

Isto último cualificouno de "especialmente importante porque -Galicia- é unha economía moi aberta e internacionalizada e depende moito" do exterior.

"O efecto dos aranceis, aínda que non é moi importante para a nosa economía, si que indirectamente afecta aos principais socios, como Francia, Portugal ou Alemaña", constatou.

Así mesmo, asegurou que a economía galega "segue mellorando a súa converxencia cunha tendencia superior á media", e deu datos da súa relación coa media europea.

Preguntado polo feito de crecer menos que a media española, dixo que son "apenas dúas décimas de diferenza" e atribuíuno ao "compoñente do consumo que deriva da estrutura demográfica da comunidade", con poboación maior de 65 anos "que ten unhas pautas de consumo menor que poboación activa".

Neste escenario, o responsable de Facenda espera continuar "así", aínda que "sempre se quere mellorar", e descartou que revisar as previsións para este ano 2026 estea "agora mesmo" sobre a mesa, aprazando dita decisión, de tomala, a "polo menos que pase a primavera".