A inflación modérase cinco décimas en xaneiro, ata o 2,4 %, pola enerxía

O Índice de Prezos de Consumo (IPC) arrincou o ano no 2,4 % interanual, cinco décimas menos que a taxa de decembro, debido fundamentalmente ao comportamento da electricidade e os carburantes.

Segundo o indicador adiantado publicado este venres polo Instituto Nacional de Estatística (INE), na evolución de xaneiro influíu a electricidade, que moderou a súa subida, e o descenso dos prezos dos carburantes.

A taxa de inflación de xaneiro é a máis moderada desde mediados do ano pasado (2,3 % de xuño de 2025).

Doutra banda, a inflación subxacente, que exclúe do seu cálculo a enerxía e os alimentos non elaborados, mantívose no 2,6 % por terceiro mes consecutivo.

Segundo o INE, esta taxa non se situaba por encima do IPC xeral desde maio de 2025.

O Ministerio de Economía valorou que a inflación segue moderándose en liña co obxectivo do BCE de que se manteña estable preto do 2 % e permite ás familias seguir gañando poder adquisitivo.

"Os prezos desaceléranse a inicios do 2026", destacaron en declaracións remitidas aos medios.

En taxa mensual, os prezos de consumo rexistran en xaneiro un descenso do 0,4 % respecto ao mes de decembro, segundo este indicador adiantado do IPC.

En canto aos prezos harmonizados (IPCH), o mes de xaneiro a taxa de variación anual estimada do IPCH baixa cinco décimas, ao 2,5 %, mentres que a subxacente é do 2,8 % e a mensual do 0,7 %.

O INE lembrou que os datos deste IPC son os primeiros na nova base 2025, na que se pasa de 12 a 13 grandes grupos, revísase a cesta da compra, actualízanse ponderacións e inclúense novidades metodolóxicas.

Por exemplo, entraron produtos como aguacates, arandos, refrescos de té, cervexa con limón e radiografías e saíron outros en desuso, como a gravata e o pano.

O INE publicará o próximo 13 de febreiro o dato definitivo de inflación de xaneiro e mais o detalle de evolución de todos os grupos.