O Goberno de Truss dá marcha atrás e emenda case por completo o seu plan fiscal
O Goberno de Truss dá marcha atrás e emenda case por completo o seu plan fiscal
O novo ministro de Economía anuncia un paso atrás nas medidas anunciadas hai só tres semanas polo seu antecesor
O ministro británico de Economía, Jeremy Hunt, anunciou este luns que anula a rebaixa prevista do 20 % ao 19 % a partir de abril da banda básica do imposto sobre a renda, a fin de reducir o endebedamento público e acougar aos mercados.
As axudas para reducir o prezo da factura enerxética para empresas e fogares introducidas este mes e que debían durar dous anos restrinxiranse tamén ao comezo do novo exercicio fiscal en abril, afirmou nun discurso televisado.
Hunt asumiu o cargo o pasado venres en substitución de Kwasi Kwarteng, que foi cesado pola primeira ministra, a conservadora Liz Truss, despois de que a súa presentación o pasado 23 de setembro dun plan fiscal sen detalles sobre como se reduciría a débeda sementara o caos nos mercados financeiros.
Tras este anuncio a libra subiu e os xuros sobre a débeda pública británica baixaron despois desta emenda á totalidade das primeiras intencións expresadas por Liz Truss ao chegar ao cargo.
Sa revertera a decisión de conxelar o imposto de sociedades, que en abril subirá do 19 ao 25 %, salvo para as pequenas empresas.
A primeiros de outubro tamén anulara a rebaixa do 45 ao 40 % da banda alta do imposto sobre a renda, tras as críticas recibidas.
Do plan presentado polo efémero ministro de Economía, o primeiro nomeado por Truss, só se mantén a conxelación das contribucións á seguridade social e a rebaixa do imposto sobre a compra da vivenda.
Comparecencia na Cámara dos Comúns
O novo ministro de Economía compareceu pola tarde na Cámara dos Comúns onde deu máis detalles da nova estratexia financeira, que vai presentar ao completo o 31 de outubro.
O ministro británico de Economía, Jeremy Hunt, anunciou a creación dun consello financeiro formado por expertos para asesorar o Goberno conservador do Reino Unido, coa fin de aportar credibilidade tras o desmantelamento do plan fiscal.
O novo consello asesor do Tesouro estará constituido por Rupert Harrison, antiguo xefe de gabinete do exministro de Economía George Osborne, xunto con representantes do sector económico e financeiro.
Hunt recoñeceu ante os deputados que a anulación da maior parte das rebaixas de impostos propostos por Truss, que sembraron o caos nos mercados de divisas e débeda, foi unha decisión "moi difícil" e indicou que se aveciñan recortes no gasto para equilibrar as finanzas públicas.
