O fiscal do Supremo nega presións da Fiscalía Xeral para cambiar de criterio sobre Puigdemont

O fiscal do Supremo tamén se opón a investigar a Puigdemont por terrorismo no caso Tsunami.  Así o plasma no último informe, coñecido hai unhas horas, onde cualifica os disturbios como desordes públicas agravadas e danos. Pero segundo apuntan varios medios, non mantivo sempre este criterio. 

Elaborou un primeiro borrador onde si defendía a existencia de delito de terrorismo contra o expresidente catalán. Fontes fiscais citadas por varios medios aseguran que Álvaro Redondo cambiou de criterio despois de reunirse co fiscal xeral do Estado. Nun comunicado, a fiscalía xeral do Estado nega calquera presión ao fiscal do Supremo para que modificara o seu escrito. E o propio fiscal do Supremo, noutro comunicado, sostén que non recibiu ningunha imposición.

O PP pide saber a verdade e reclama a comparecencia de García-Ortiz no Congreso para que explique o que pasou nesa xuntanza. Os populares poñen en dúbida a súa credibilidade e independencia.

Para o Goberno, estes cambios de criterio son habituais na xurisdición penal. O ministro de Transportes, Óscar Puente lembra que a fiscalía "é unha institución xerárquica" en que moitas veces un informe do Ministerio Fiscal ten "algún contido distinto" ao criterio do fiscal do asunto.

Con este último informe, o fiscal do Supremo coincide co da Audiencia Nacional e discrepa da valoración do xuíz, Manuel García-Castellón. Este segundo informe non é definitivo. Este martes vai ser sometido á Xunta de Fiscais, encargada de fixar a posición final. A posible imputación por terrorismo a Puigdemont podería ser clave nas negociacións da lei de amnistía entre os socialistas e Junts per Catalunya.