Zelenski denuncia un ataque masivo ruso con 40 mísiles e 580 drons
Segundo o mandatario ucraíno, tres persoas morreron nun edificio residencial da cidade de Dnipró
Evacuación dunha das persoas feridas en Dnipró. FOTO difundida por REUTERS
O presidente de Ucraína, Volodímir Zelenski, denunciou un "ataque masivo" ruso contra o seu país na madrugada deste sábado.
"Ucraína estivo baixo un ataque masivo durante a noite. O inimigo lanzou 40 mísiles, de cruceiro e balísticos, e uns 580 drons de varios tipos (...). O obxectivo do noso inimigo foron as nosas infraestruturas, áreas residenciais e empresas civís", escribiu Zelenski na súa canle de Telegram.
Segundo o mandatario, un dos mísiles impactou nun edificio residencial da cidade de Dnipró e deixou tres persoas falecidas e varias feridas.
"Cada un destes ataques non é unha necesidade militar senón unha estratexia deliberada de Rusia de intimidar civís e destruír a nosa infraestrutura", sinalou.
O xefe de Estado ucraíno pediu unha "resposta internacional forte" e fixo fincapé na necesidade de fortalecer as defensas antiaéreas de Ucraína con axuda externa e ampliar as sancións contra Rusia.
