Netanyahu: "Non haberá cesamento do fogo sen o regreso dos reféns"

O primeiro ministro israelí, Benjamín Netanyahu, reiterou este domingo, cando fai seis meses de guerra en Gaza, que non haberá un acordo de tregua se non volven a casa os 133 reféns que seguen en mans de Hamas.

"Deixeino claro á comunidade internacional: non haberá cesamento do fogo sen o regreso dos secuestrados. Simplemente non sucederá", dixo nun discurso antes de reunirse co seu gabinete.

Lembrou que o Goberno de Joe Biden comparte a mesma opinión, dixo que Israel non se opón a un acordo de tregua e culpou a Hamas de "esixencias extremas" co obxectivo de poñer fin á guerra "para garantir a súa supervivencia, a súa rehabilitación".

"Ceder ás esixencias de Hamas permitiralle tentar repetir unha e outra vez os crimes do 7 de outubro, como prometeu facer".

Manifestación en Xerusalén

Esta noite hai convocada unha manifestación antigobernamental multitudinaria en Xerusalén, na que van participar activistas e algúns familiares de reféns, que culpan a Netanyahu de estar máis preocupado pola súa supervivencia política que por devolver os seus a casa.

"Cidadáns de Israel, non hai guerra máis xusta que esta e estamos decididos a terminala cunha vitoria total", asegurou o mandatario.

Culpa a Irán

Netanyahu culpou tamén a Irán do ataque perpetrado por Hamas o pasado 7 de outubro, que deixou 1.200 mortos en chan israelí e desencadeou a guerra, e urxiu á cidadanía a unirse "na necesidade de seguir loitando ata a vitoria" total en Gaza.

Ademais, asegurou que Israel "está preparado, en defensa e en ataque, para calquera intento" que busca danar o país dende calquera lugar.

Retirada de tropas

O Exército israelí retirou esta noite todas as súas tropas terrestres do sur da Franxa de Gaza, e só queda unha brigada no enclave, segundo confirmou este domingo unha fonte militar.

A retirada prodúcese despois de catro meses de combate na zona de Jan Yunis e cando se cumpren seis meses do comezo da guerra entre Israel e Hamas no enclave palestino.

Agora só queda unha brigada israelí que se ocupa de asegurar un corredor entre o sur de Israel e a costa gazatí, bloqueando o paso ao norte da Franxa e facilitando as operacións no centro e no norte do territorio.

Próximo obxectivo

Nunha mensaxe en X, o exministro de Xustiza israelí Gideon Sa'ar criticou a retirada de tropas, asegurando que "a continua diminución do tamaño das forzas" israelís en Gaza "afastounos de alcanzar os obxectivos da guerra".

O próximo obxectivo de Israel en Gaza parece ser a xa anunciada incursión militar en Rafah, no sur do enclave, onde viven 1,4 millóns de persoas desprazas e aínda quedan, segundo o Exército, catro batallóns de Hamas. Os EUA, o seu principal aliado militar, opóñense.