O Etna entra de novo en erupción con fontes de lava e explosións

O Etna, o volcán máis activo de Europa, entrou esta madrugada nunha nova fase eruptiva no seu cráter sueste, con explosións desde varias bocas do cume e a emisión de fluxos de lava, sen afectar polo momento á actividade aérea no aeroporto de Catania (Sicilia, sur de Italia). A actividade do volcán comezou a intensificarse ás 02:45 hora local deste mércores, cando se iniciaron as fontes de lava, que chegaron a alcanzar os 200-300 metros de altura sobre os respiradoiros do cume de cráter, informou o Instituto Nacional de Xeofísica e Vulcanoloxía (INGV). Sobre as 03:30 iniciouse unha breve choiva de lapilli na ladeira superior suroccidental, engadiu o instituto nun comunicado.

Desde o punto de vista sísmico, a amplitude media do tremor volcánico alcanzou o seu valor máximo ao redor das 02:00 e actualmente atópase nun valor alto constante. Os veciños das zonas contiguas sentiron claramente o estrondo provocado pola erupción, e informouse da caída de cinza volcánica nalgunhas localidades, como Paternò, segundo os medios locais.

"A localización do centro da fonte do tremor sitúase na zona do cráter sueste a unha altitude duns 2.700 metros sobre o nivel do mar", indicou o INGV, ao explicar que a actividade infrasónica é elevada tanto na taxa de ocorrencia como na enerxía dos eventos localizados no cráter sueste.

O INGV prevé que as nubes eruptivas producidas pola actividade en curso se dispersarán en dirección sur-suroeste. De momento, a nova erupción, cunha altura estimada da nube volcánica de 5.000 metros, non afecta as operacións do Aeroporto Internacional Vincenzo Bellini de Catania.