O desenvolvemento das renovables, clave para garantir a competitividade da industria

A Xunta e os axentes sociais coinciden na importancia do desenvolvemento das enerxías renovables en Galicia para garantir a competitividade da industria.

O vicepresidente primeiro participou nunha nova xuntanza da mesa do diálogo social onde lles presentou á Confederación de Empresarios e aos sindicatos UXT e Comisións Obreiras os proxectos tractores con que Galicia agarda obter fondos europeos.

Todos coincidiron en sinalar  que será necesario o desenvolvemento das enerxías renovables para garantir a competitividade da industria.

"Hai dous elementos que son, nestes momentos, determinantes; tanto o desenvolvemento do sector eólico e, polo tanto, a vinculación dos parques eólicos cos proxectos industriais e, ao mesmo, a planificación eléctrica que debe permitir atender as demandas que teñen os proxectos desde o punto de vista de subministración de electricidade", dixo Francisco Conde, vicepresidente primeiro da Xunta e conselleiro de Economía.