O Deportivo lanzará unha ampliación de capital para lograr 30 millóns de euros
Convoca unha xunta extraordinaria o 5 de febreiro para votar unha nova ampliación de capital aberta aos accionistas
Foto Deportivo
O R. C. Deportivo convocou unha Xunta Xeral Extraordinaria de Accionistas para o vindeiro xoves 5 de febreiro de 2026, ás 9:00 horas, cun único punto de calado na orde do día: a aprobación dunha nova ampliación de capital destinada, segundo recolle a propia convocatoria, a “incrementar a estabilidade financeira” do club.
A Xunta celebrarase en primeira convocatoria no Estadio ABANCA-RIAZOR, aínda que con asistencia exclusivamente telemática por parte dos accionistas e os seus representantes, de acordo con o previsto nos Estatutos Sociais. En caso de non alcanzarse o quórum necesario, a segunda convocatoria quedaría fixada para o 6 de febreiro, no mesmo lugar e á mesma hora.
O Consello de Administración someterá a votación un aumento do capital social mediante achega monetaria, dirixido a todos os accionistas do club. A operación contempla a emisión de 53.794.643 novas accións, de 0,08 euros de valor nominal cada unha e cunha prima de emisión de 0,48 euros por acción.
Esta inxección de capital súmase á do verán de 2024 cunha redución e ampliación de capital coa que Abanca condonoulle a débeda de 70 millóns que a entidade mantiña coa entidade crediticia e inxectoulle outros 35 millóns.
