O Congreso limita a tres minutos o tempo de espera en atención telefónica

O Pleno do Congreso aprobou, cos votos a favor de PSOE, PP, Unidas Podemos, ERC, Bildu, PNV, Cidadáns, Más País-Equo, Coalición Canaria, Foro Asturias, Teruel Existe e Partido Rexionalista de Cantabria (PRC), a lei que regula o servizo de atención ao cliente e que, entre as súas medidas, limita a tres minutos a espera telefónica da atención ao cliente e regula a atención robótica.

A norma limita o tempo para ser atendido telefonicamente en servizos xerais de información, reclamación e posventa, unha redución de tempos que tamén beneficiará ás persoas afectadas por incidencias en servizos básicos de continuidade como a luz, a auga ou o gas.

Cando entre en vigor a normativa, as empresas destes sectores deberán informar do motivo do problema e dar un tempo estimado para a restauración da subministración nun prazo máximo de dúas horas, entre outras medidas.

Contestadores automáticos

En canto aos límites ao uso de contestadores automáticos cos que as empresas se relacionan cos consumidores, a nova lei determina que a atención deberá ser personalizada, é dicir, prohibe a atención robótica, cando o cliente así o solicite.

O texto tamén recolle garantías para a atención a persoas vulnerables e con discapacidade, que poderán elixir o formato de comunicación co servizo de atención á clientela, e obriga a facer pública a avaliación dos clientes da atención recibida.

A definición de operador, a obrigación de garantir que "o 95 % das solicitudes de atención personalizadas sexan atendidas", ou que a Administración fomente a colaboración do Consello de Consumidores e Usuarios e as asociacións que o integran coas organizacións de empresarios e as empresas, son outras das medidas que recolle o texto.

O ministro de Consumo, Alberto Garzón destacou que é a primeira norma sobre este tema que se aproba no país.