Vilar de Barrio enxalza a pataca limiá na 46 edición da súa festa
Hai degustacións, mostra de produtos de outono, atividades culturais e o tradicional concurso da pataca
A festa serve tamén para revindicar a cultura do rural, os labores agrícolas e os oficios tradicionais
Destaca o tradicional concurso da pataca e tamén doutro produtos agrícolas.
A comarca da Limia é a primeira produtora de patacas en Galicia e esta fin de semana exalza a raíña da súa terra. Con denominación de orixe e tamén sen ela, no concello de Vilar de Barrio celebran a 46 edición da festa do seu produto estrela.
Hai degustacións onde a calidade do produto non decepciona. Tampouco defraudan a diversidade de produtos de outono que se exhiben e as actividades culturais do seu programa.
Porén, o que segue a espertar unha grande expectación é o tradicional concurso da pataca: á máis grande, bonita ou diferente. Porque hainas con formas ben estrañas e a singularidade tamén ten premio.
Destacan as súas decoracións coa pataca como protagnista nas creacións dos máis cativos. Ademais, houbo demostracións do oficio da forxa tradicional, que moitos aínda lembran, música e gastronomía, con patacas, claro!
