O Celta Fortuna remonta en Avilés (1-2) e consolídase no segundo posto

O Celta Fortuna continúa ofrecendo unhas prestacións espectaculares nesta temporada, que o levan a ser o único equipo que pode seguir o ritmo dun Tenerife intratable. Logo do triunfo en Avilés está a catro puntos do liderado.

O partido comezou co Avilés algo máis enchufado. Axiña os asturianos pediron unha revisión dun centro á área no que viron mans de Milla. O árbitro non sinalou a infracción. Logo dun par de accións de perigo, un remate de Cayarga e outro de Hugo González, ía chegar o primeiro tanto do partido. Foi nun córner local que rematou á rede Babin no segundo pau.

O Celta Fortuna non acusou o golpe. Ao contrario, foise facendo co control do partido. E Hugo González ía empatar cun lanzamento de falta espectacular. O treito final da primeira metade rexistraron varios córners con perigo dos vigueses, pero o empate foi o resultado ao descanso.

A segunda metade comezou como rematara a primeira, co Celta Fortuna dominando e achegándose con perigo aos dominios de Álvaro Fernández, que tivo que sacar abaixo un remate lonxano de Milla.

Pero o Avilés sacudiu o dominio, e fíxoo a balón parado. Un remate de córner acabou batendo na parte superior do traveseiro de Coke. E unha falta lateral deixou tamén un remate con moito perigo de Cayarga que sacou o porteiro.

Despois de ter Gavián unha boa ocasión que rematou ás nubes, Coke tivo que empregarse a fondo a remate de Guzmán Ortega. E, co partido roto, chegaba o un a dous. Foi nun córner no que apareceu Óscar Marcos no segundo pau para roubarlle a carteira ao seu par. O tanto foi inicialmente anulado, pero a revisión non revelou nada antirregulamentario. Así que o tanto subiu ao marcador, converténdose no 1-2 definitivo. Un resultado que lanza aos de Fredi na segunda praza.